Главната тема на разговорите на шефовите на дипломатиите на двете најмоќни земји која се одвива во вторникот во Москва е решавањето на кризата во Сирија и перспективата за заедничките напори во борбата со меѓународниот тероризам, пренесуваат руските медиуми од состанокот кој е во тек меѓу рускиот министер за надворешни работи Сергеј Лавров и американскиот државен секретар Џон Кери, кои потоа во текот на денот ќе ги прими рускиот претседател Владимир Путин.

На отворањето на средбата, рускиот министер за надворешни работи Сергеј Лавров истакна дека претседателите на Русија и на САД последните месеци во неколку наврати дискутираа за проблемите во врска со потребата од поефикасна борба против тероризмот.

„Во овој сегмент сé уште има прашања кои неопходно треба денеска да ги разгледаме во контекстот, особено за натамошната работа на Меѓународната група за поддршка на Сирија. Самото решавање на сириската криза го бара постојаното наше внимание со согласност со задачите и договорите постигнати во Виена во рамките на двете заседанија на оваа група“, истакна Лавров.

Притоа истакна дека проблемот со тероризмот е поширок, отколку самото сириско прашање. Особено, што во последниот период се забележува зајакнување на сунитската терористичка организација Исламска држава во Либија.

„Исламската држава е активна во Ирак, терористички акти извршува во Јемен и во Авганистан. Се надевам дека денеска ќе можеме да разговараме за овие комплексни прашања“, додаде Лавров.

Американскиот државен секретар Џон Кери, од своја страна, изрази согласност дека е неопходна заедничка борба против Исламската држава.

„Се разбира, САД и Русија се согласни дека Исламската држава претставува заедничка за закана, закана за нашите земји и нации, со нив е невозможно да се преговара, тие се терористи кои ја напаѓаат нашата култура, достоинството, и не ни оставаат никаков избор, освен борбата“, рече Кери.

Потсети дела двете земји успешно го водат дијалогот за решавање на кризата во Сирија во рамките на меѓународните состаноци во Виена. „Се надевам дека ќе можеме да ги продолжиме заедничките напор во Њујорк“, додаде шефот на американската дипломатија.

Кери претходно деновите изјави дека целта на третиот круг од преговорите за Сирија е да се одржи во Њујорк на 18-ти декември. Досега не беше познато дали договорот на средбата со Лавров значеше и потврдување дека состанокот ќе се одржи на тој датум.

САД, Русија и Европската унија, како и претставниците на блискоисточните и други влијателни земји се договорија во Виена во ноември двегодишен план кој би требало да доведе до политичка трансформација и одржување избори во Сирија. Сепак, останаа нерешени уше многу прашања, како и иднината на сирискиот претседател Башар ал-Асад.

Лавров и Кери се осврнаа и на проблемот на решавањето на кризата во источна Украина, Притоа рускиот дипломат, во овој контекст, побара од Вашингтон да влијае на Каев, со цела да издејствуваат од него поконструктивна улога во преговорите.

„Секако дека сме заинтересирани да продолжи дијалогот започнат меѓу претседателите на Русија и на САД, за тоа како Соединетите држави можат да придонесат за решавање на кризата во Украина. Имајќи го предвид нивото на влијание на Вашингтон врз Киев, тоа би претставувало допра поткрепа за активностите на ‘Нормандиската четворка‘ (Украина, Русија, Франција и Германија – з.р.), смета Лавров.

Кери, пак, во овој контекст искажа надеж дека неговата посета на Москва ќе помогне во постигнувањето напредок во ова, како и во останатите прашања. „Претседателите Путин и Обама јасно ставија до знаење дека сакаат да се најде излез за решавањето на кризите во Сирија и во Украина“, истакна челникот на американската дипломатија.

Начелно, Лавров и Кери се согласија дека соработката меѓу Москва и Вашингтон е неопходна за решавањето на големите меѓународни прашања, и истакна дека очекуваат да постигнат напредок во низа теми во текот на посетата на американскиот државен секретар на Русија.

„Се надевам дека вашата посета ќе биде плодотворна“, му се обрати Лавров на Кери, кој возврати дека е убеден оти од соработката меѓу Русија и САД полза ќе има целиот свет. „Се надевам дека ќе успееме да постигнеме напредок во рамките на овој состанок, делка двете држави ќе можат да најдат заеднички јазик и да се договорат за конкретните прашања“, истакна./крај/мф/сн

Извор: Макфакс