Руското министерство за надворешни работи во четвртокот објави дека смета оти воздушните напади врз џихадистите од Исламската држава во Сирија без мандат од Советот за безбедност на Обединетите нации и без координација со властите во Дамаск, би претставувал акт на агресија, а истовремено по Турција и Велика Британија и Германија објавија дека нема да учествуваат во воздушните напади.
 

Руското министерство за надворешни работи во четвртокот објави дека смета оти воздушните напади врз џихадистите од Исламската држава во Сирија без мандат од Советот за безбедност на Обединетите нации и без координација со властите во Дамаск, би претставувал акт на агресија, а истовремено по Турција и Велика Британија и Германија објавија дека нема да учествуваат во воздушните напади.

„Американскиот претседател зборуваше директно за можност од воздушни напади на американските воздушни сили врз позициите на Исламската држава (IS) во Сирија без дозвола на нејзината легитимно избрана влада. Таквиот потег, додека не постои резолуција на Советот за безбедност на ОН, би претставувал акт нa агресија и големо кршење на меѓународното право“, изјави портпаролот на руското министерство за надворешни работи, Александар Лукачевич, пренесе агенцијата Интерфакс.

Ист став има и сирискиот министер за национално помирување, Али Хајдар. „Секоја акција преземена без одобрение на сириската владата е чин на агресија врз Сирија. Мора да постои соработка и координација со Сирија и мора да постои сириско одобрување за секоја акција, военa или каква и да е друга“, изјави Хајдар на прес-конференција во сириската престолнина Дамаск, пренесува AFP повикувајќи се на сириските државни медиуми.

Претходно месецов зборувајќи за оваа тема американскиот претседател Барак Обама рече дека Вашингтон доколку прибегне на овој чекор нема да го консултира Дамаск, кој, пак, соопшти дека американските напади мора да бидат во координација со владата на претседателот Башар ал-Асад, кој инаку е трн во окото на Западот како регионален сојузник на Русија, и три ипол години ги поддржуваат сунитските бунтовници кои се обидуваат да го соборат.

Министрите за надворешни работи на Германија и Велика Британија по средбата во Берлин, објавија дека нивните земји нема да учествуваат во воздушните напади врз џихадистите од Исламската држава (IS) во Сирија.

Шефот на германската дипломатија, Франк-Валтер Штајнмаер на прес-конференцијата изјави дека Германија не е повикана да им се придружи на воздушните напади и дека нема да учествува во нив. „Да бидеме сосема јасни, не сме повикани тоа да го правиме и нема да го правиме тоа“, пренесе агенцијата DPA.

Неговиот британски колега Филип Хамонд изјави дека Велика Британија „целосно го поддржува американскиот пристап за потребата за воспоставување меѓународна коалиција“ против Исламската држава, којашто ја нарече „варварска“, додавајќи дека неговата земја „не исклучува ништо“ околу начините за помош на таа коалиција.

Сепак, на прашање на новинарот на Reuters за учество во воздушните напади во Сирија коишто ги најави американскиот претседател, Хамонд одговори: „Ќе бидам јасен. Велика Британија нема да учествува во ниедни воздушни напади во Сирија. Уште минатата година за тоа расправавме во парламентот, и на таа тема нема да се навраќаме“.

Меѓутоа, подоцна по изјавата на Хамонд, портпаролот на британскиот премиер Дејвид Камерон изјави дека Лондон не ја исклучува воената акција против Исламската држава во Сирија. „Кога станува збор за воздушните напади, премиерот не исклучува ништо и тоа е официјалниот став“, рече портпаролот на Даунинг стрит 10.

Ниту Анкара има намера да учествува во воздушните напади врз џихадистите од IS на територијата на соседна Сирија, изјави претходно во четвртокот за AFP неименуван извор од турскиот парламент. „Турција нема да учествува во никаква воена операција, туку целосно ќе се посвети на хуманитарните операции. Турција нема да учествува во каква и да е борбена операција и нема да испраќа свое оружје“, истакнал соговорникот на агенцијата, но додал дека турската страна би можела да го дозволи користењето на својата воена база Инчирлик како логистичка поддршка на акциите.

Американскиот претседател Барак Обама најави ноќта кон четвртокот дека САД ќе ја прошират воената кампања и воздушните удари против Исламската држава во Ирак и првпат ќе гаѓаaт цели на џихадистите во Сирија. Обама порача дека ќе удри врз Исламската држава „каде и да се наоѓа“, благодарејќи на американското воено воздухопловство, и поради поддршката на ирачките сили, од една страна, и поради поддршката на, како што ја нарече умерената сириска опозиција, којашто како и џихадистите ги обединува сунитите во оваа земја./крај/мф/сн

Извор: Макфакс