Русија во средата на гласањето во Советот за безбедност во Обединетите нации, како што најави претходно, вложи вето на резолуцијата за формирање специјален меѓународен суд кој би им судел на одговорните за уривање на патничкиот авион на малезиската компанија „Malaysia Airlines“, точно пред една година на истокот од Украина.

Од 15-члениот Совет за безбедност на ОН, 11 земји гласале за формирање на посебниот суд што го побараа пет земји кои водат засебни истраги за несреќата: Малезија, Холандија, Австралија, Украина и Белгија, кои беа помогнати од Велика Британија, САД и Франција. Три земји биле воздржани на гласањето, Кина, Ангола и Венецуела, пренесува Reuters.

Русија, којашто исто така, води своја истрага за несреќата, како постојана членка на Советот за безбедност располага со правото да стави вето.

Американската амбасадорка во ОН, Саманта Пауер, изјави дека е „скандализирана од руското вето „во обидот 298-те жртви во несреќата да ја добијат правдата“, цитира AFP.

Претходно во средата холандската влада објави дека премиерот Марк Руте „му упатил итен повик на рускиот претседател Владимир Путин за да се овозможи судење на виновниците за несреќата на MH17 на судот на ОН“,

Рускиот претседател Владимир Путин во средата изјави дека Москва ќе вложи вето на секоја резолуција на Советот за безбедност за основање меѓународен суд за несреќата, бидејќи според неговата оцена тоа „не е исправно“, бидејќи Русија има многу прашања во врска со истрагата во која имала ограничен пристап до информациите.

Властите во Донецк и властите во Киев се обвинуваат меѓусебно и ја префрлаат одговорноста за уривањето на авионот при што загинаа 298 луѓе, претежно холандски државјани. Во тек е меѓународна истрага којашто се обидува да ги открие околностите кои довеле до несреќата.

Авионот „Boeing 777“ на компанијата „Malaysia Airlines“ се урна на 17-ти јули 2014 година при што загинаа сите 298 патници и членови на екипажот на летот Амстердам – Куала Лумпур. Киев и Западот тврдат дека авионот е соборен со ракета истрелана од проруските бунтовници со ракетен систем БУК кој им го дала Русија. Москва, пак, презентира сателитски снимки според кои ракетата е истрелана од таков систем, како и дека покрај авионот летал украински борбен авион од типот „Сухој Су-35.“

На почетокот од јуни во Москва беше откриен идентитетот на државјанинот на Украина, Евгениј Агапов, кој се наоѓа во Русија под заштита на државата е сведок, и тој работел како механичар за вооружување на Првата ескадрила од бригадата за тактичка авијација на воздухопловните сили на Украина, според чие сведоштво наводно постои голема веројатност да се идентификува пилотот на украинскиот борбен авион кој наводно го соборил малезискиот патнички авион.

Mалезиските медиуми уште минатата година објавија мислења на независни експерти за авионски несреќи, кои тврдеа дека снимките од остатоците од урнатиот авион покажуваат дека на трупот имало дупки коишто можат да ги прават делови од ракети или муниција од топови на борбени авиони, како и дека летал 460 километри посеверно до предвидената маршрута./крај/мф/сн

Извор: Макфакс