Руските воздухопловни сили во понеделникот објавија дека првпат извеле воздушни удари во околината на сирискиот град Палмира, една од базите на екстремната сунитска организација Исламска држава, во извештајот за последните два дена, додека сириската армија објави дека во своите напредувања во северната покраина Алепо повратила под контрола единаесет села, и ликвидирала „десетици терористи“ во покраините Хомс и Хама.

Руските воздухоплови уништија одбранбени позиции и противвоздушни системи на Исламската држава во близина на Тадмур (арапско име за древниот град Палмира), се наведува во соопштението на руското министерство за одбрана за бомбардирањето на 237 терористички цели во Сирија во последните 48 часа.Инаку сириската телевизија на почетокот од октомври објави дека руските борбени авиони ги бомбардирале позициите на џихадистите во околината на Палмира, што подоцна беше официјално демантирано од руското министерство за одбрана.Искористувајќи ја речиси петгодишната граѓанска војна во Сирија, Исламската држава на 21-ви мај годинава ја зазема Палмира, 205 километри источно до главниот град Дамаск, откако владините сили се повлекоа евакуирајќи дел од непроценливото археолошко наследство и населението. Џихадистите потоа ги погубија најпознатите сириски експерти за археологија кои одбија да го напуштат локалитетот кој е под заштита на УНЕСКО, а потоа и повремено ги уништуваат едни највредните историски споменици во регионот. Руските авионите во последните два дена имале 131 полетувања и бомбардирале џихадистички цели во покраините Хама, Хомс, Латакија, Алепо, Рака и во околината на престолнината Дамаск, се додава во соопштението на министерството за одбрана, пренесува агенцијата ТАСС.Во Латакија, портпаролот на сириската армија, бригадниот генерал Али Мајихуб, на брифинг со новинарите соопштил дека војската по руските бомбардирања напредувала кон Палмира при што ликвидирала 40 милитанти околу правците Палмира – Бејрут и Ал-Фул – Малатија, кои минуваат низ сириските покраини Хомс и Хама.„Нашите војски нанесоа моќни удари врз единици на терористите во областите северно од Хомс. Десетици милитанти, исто така, се убиени во борбите за местата Рухум, Ум Шаршух, и за јужните предградија ал-Растана, ел-Гант, Тел-Биси“, прецизирал генералот, пренесува сириската државана агенција SANA.Според генералот Махијуб, во северната покраина Хама сириските трупи спречиле обид за продор на терористите во областа Ачан – Тел-Сукејк, „при што на екстремистите им се нанесени тешки загуби“. „Целосно е уништена единица на милитантите во селото Заарур, во северниот дел од покраината Хама“, додал портпаролот на сириската армија.Мајихуб додал дека сириските сили претрпеле загуби од „десетици борци“ во борбите за јужните области на земјата, но истакнал дека „војниците многу се жртвуваа за ослободување на териториите, уништувајќи голем број бунтовници“ при што успеале да ја преземат контролата врз поранешните производствени комплекси на „Мрецедес“ и на „Пежо“ во близината на Дамаск, „блокирала група терористити во ал-Самади и уништиле две единици на милитантите во Западна Гута“..Иранската телевизија на англиски јазик Press TV објави подоцна во понеделникот дека сириската армија заземала од под контрола на терористичките осум села во северната провинција Алепо. Сириските копнени сили поддржани од локалните милиции и доброволци од Иран и Ирак и борци на либанското движење Хезболах последните две седмици започнаа офанзива и во последните 24 часа и користејќи ги руските воздушни удари ослободиле уште шест села во јужниот дел од покраината Алепо, изјави сириски командант./крај/мф/сн

Извор: Макфакс