Руското министерство за одбрана во четвртокот извести дека има сериозни причини да верува дека Турција подготвува воена интервенција во соседна Сирија, потсетувајќи дека Анкара изминатите денови го забрани надлетувањето на турската територија на руските извиднички авиони во рамките на меѓународната соработка „отворено небо“ со кои се прави воздушен мониторинг над териториите на одреден земји од страна на други.

„Имаме сериозни причини да се сомневаме во интензивната подготовка на Турција за воена инвазија врз територијата на една суверена земја – Сириската Арапска Република… Знаците на прикриените подготовки на турските вооружени сили да дејствуваат на територијата на Сирија ги фиксираме сé повеќе и повеќе“, изјави портпаролот на руското министерство за одбрана, генерал-мајорот Игор Конашенков.

Според него, министерството за одбрана ѝ ги презентирало на меѓународната заедница „непобитните видео докази“, на коишто турските оклопни артилериски сили гранатираат сириски населени места во северниот дел на покраината Латакија, во којашто во текот на изминатите две седмици силите на сириската влада ги заземаа сите стратешки позиции и речиси целосно ги истиснаа бунтовниците, вклучително и од сунитската радикална група Исламска држава, од покраината.

„Изненадени сме од вообичаено зборлестите Пентагон, НАТО и многубројните таканаречени организации за човекови права во Сирија, од тоа што и покрај нашите апели да реагираат на овие дејствија, тие досега упорно молчат“, додаде Конашенков на брифингот со новинарите во Москва.

Портпаролот на руското министерство за одбрана, исто така, извести и дека министерството ги засилило активностите на сите видови разузнавање во регионот на Блискиот исток.

„Доколку некој во Анкара смета дека забраната за прелетот на руските набљудувачи ќе му овозможи нешто да сокрие, тоа е непрофесионално од негова страна“, порача Конашенков.

Претходно во четвртокот Москва уште еднаш понуди докази дека нејзините авиони не го повредиле турскиот воздушен простор и дека со тие обвинувања Анкара се служи како покритие за засилените воени активност на сириската граница.

Анкара веќе неколкупати избегна да одговори на директните барања на Москва со докази да ги поткрепи нејзините тврдења според коишто руските борбени авиони коишто дејствуваат во Сирија го повредиле турскиот воздушен простор, изјави на прес-конференцијата портпаролката на министерството за надворешни работи Марија Захарова

Турскиот премиер Ахмет Давутоглу, пак, ги повика САД да заземат „порешителен став“ против Русија поради интервенцијата во Сирија започната ланскиот 30-ти септември, иако Вашингтон ја предводи истата кампања повеќе од година и половина.

Давутоглу забележува дека по секој разговор меѓу Вашингтон и Москва, Русија изведува сé повеќе воздушни напади во Сирија.

„Сите коишто му помагаат на режимот на сирискиот (алвитски – шиитски – з.р.) претседател Башар ал-Асад, се сторители на воено злосторство. Ова го истакнува токму денеска бедејќи Алепо е под жестоко бомбардирање на руските воени авиони. Се бомбардираа училишта и болници, а не позициите на Исламската држава. Тоа е воено злосторство, тоа е етничко чистење. Клучната причина на овој проблем се воени злосторства кој ги сторил сирискиот режим, како и воените злосторства кои ги сторила Исламската држава“, изјави Давутоглу, челникот на сунитска Турција.

До пред офанзивата на сирсиката армија помогната од ударите на руската авијација екстремната сунитска организација Џебхат ан-Нусра (Фронтот на победата) се смета за сирискиот огранок на глобалната терористичка организација Ал Каеда, држеше под своја контрола околу 60 отсто од покраината Алепо, која инаку се сметаше за едн од упориштата на претседателот Асад.

Алепо, кој е инаку најголем град во земјата, е поделен од јули 2012 година на сектор под контрола на лојалистите кон претседателот Башар ал-Асад, христијани, шиити и либерални сунити, и опозициските сунитски вооружени сили кои ги држеа источните населби. Бунтовниците од октомври 2014 година им се закануваше опсада поради напредувањето на владините сили кои се обидуваат да ги спречат правците за снабдување, а потоа беа потиснати и од силите на исламситичките групи Исламска држава и Џебхат ан-Нусра./крај/мф/сн

Извор: Макфакс