Руското министерство за одбрана може да донесе одлука по предлогот на американските колеги од Пентагон за координација во борбата против терористичката организација Исламска држава во Сирија, за што руските експерти ги разгледувале деталите во средата, соопшти портпаролот додека на ова боиште по руските воздушни напади започна копненото напредување на сириската владина војска

Западните аналитичари истакнуваат дека на руската страна има две предности. За разлика од американската коалиција којашто ги бомбардираат позициите на Исламската држава од безбедни височини, руските пилото се спуштаат во „зоната на ризикот“ и летаат во дострелот на противвоздушната одбрана, но затоа се попрецизни и поефикасни, Покрај тоа, руските авиони полетуваат од аеродромите во Сирија па за само неколку минути се до целите, додека американско-блискоисточната коалиција полетува од поголеми дистанци па може да минат и неколку часа меѓу одредувањето на целта и нападот, а за тоа време терористите можат да ја напуштат областа којашто претходно е означена како цел на нападот, пренесува AFP.

„Во министерството за одбрана на Русија одговорија на барањето на Пентагон и оперативно го разгледаа предлогот на Американците за координација на дејствијата во борбата против терористичката група Исламска држава во Сирија. Начелно, овие предлози може да започнат да се реализираат“, изјави портпаролот генерал-мајорот Игор Конашенков, пренесува агенцијата РИА.

„Потребно е само да се уточнат одделните технички детали, за коишто ќе се разговара денеска меѓу претставниците на руското министерство за одбрана и на Пентагон на експертско ниво“, додава Конашенков.

Претходно во вторникот Москва објави дека е подготвена да разговара со американската страна за координација на летовите за да се избегнат инциденти над Сирија каде што Русија и коалицијата предводена од САД изведуваат засебни воени воздушни операции.

Руската армија начелно е согласна со предлогот на САД за координирање на воените летови во Сирија, изјави и заменикот руски министер за одбрана Анатолиј Антонов. Додаде дека двете земји ќе одржат видео конференција за ова прашање следните денови, пренесе агенцијата ТАСС.

Американскиот предолг вклучува темелни безбедносни протоколи, како што е одржување на сигурна оддалеченост меѓу американските и руските авиони и користење на истата радио фреквенцијата за повици во случај на итност. Портпаролот на Пентагон, Питер Кук за Reuters изјави дека САД очекуваат формален одговор од Русија на овој предлог.

Руската страна рече дека начелно е подготвена да го прифати предлогот, но дела постои многу поширок потенцијал за соработка отколку што го нуди Вашингтон. Москва, исто така, соопшти дека поднела и свои предлози, но Антонов не прецизираше за што станува збор.

Интензивниот бран руски воздушни напади продолжува и во средата, со ударите во покраините Хама и Идлиб, на западот и северозападот од Сирија, додека и силите на владата на претседателот Башар ал-Асад ја засилуваат копнената офанзива во западниот дел од земјата на најмалку четири позиции на бунтовниците.

Опозициската Сириска опсерваторија за човекови права (SOHR), којашто дејствува од Лондон, во соопштение до западните агенции вели дека воздушните удари го извршиле „авиони кои веројатно се руски“ на најмалку четири места во областа на градот Хама и ти во Идлиб. Станува збор за градовите Кафр-Зита и Кафр-Набуда во покраината Хама и градовите Кан-Шајкун и Алхбит во Идлиб.

Ударите во текот на изминатата ноќ и рано утрото во средата биле „поинтензивни од претходно“, се наведува во соопштението на SOHR и се додава дека засега нема податоци за бројот на жртвите. Сириските владини сили во поддршка на руските напади во западните покраини извеле копнени напади врз најмалку четири позиции коишто ги држат различни бунтовнички групи.

Американските сили и нивните сојузници веќе една година вршат воздушни удари врз Исламската држава во Сирија и во Ирак, а последниот бран вклучил напади на Хасака во североистокот и Манџиб на северот од Сирија. Во неделата нивните удари биле насочени на Хасака и Палмира, којашто исто така беше бомбардирана од руската авијација./крај/мф/сн

Извор: Макфакс