Северна Кореја копа нов тунел на локацијата за нуклеарни проби, имајќи предвид идно изведување на нови проми на атомски средства, соопшти во петокот Јужна Кореја, два дена пред во Сеул да се сретнат челниците на Јужна Кореја, Јапонија и Кина, каде во недела во одвоена посета во недела, исто така, ќе пристигне и американскиот министер за одбрана Ештон Картер, кој со јужнокорејските одбранбени функционери ќе разговара за реагирањата на ракетната и нуклеарна закана од Пјонгјанг.

Местото се наоѓа на источниот брег на Северна Кореја каде што се изведени претходните три нуклеарни проби, а работници и возила забрзано работат на нов тунел, пренесува јужнокорејската новинска агенција Yonhap повикувајќи се на неименувани извори во владата во Сеул.

„Фактот дека градат нов тунел упатува на тоа дека намерата е да се изведе нуклеарна проба во одреден момент“, рекол соговорникот на агенцијата. Нема докази коишто би наведувале на заклучокот дека подготовките се преземени за проба во скора иднина, додал изворот.

Извештајот се појави во моментов кога се подготвува состанокот на челниците на Јужна Кореја, Јапонија и Кина во недела во јужнокорејската престолна Сеул, на кој треба да стане збор и за задушувањето на програмите на Северна Кореја за производство на оружја за масовно уништување.

Северна Кореја упорно работи на својата нуклеарна програма, но аналитичарите не сметаат дека четвртото нуклеарно тестирање би можело да се случи наскоро, особено по договорот со Јужна Кореја постигнат во август годинава, за соработка на попуштањето на тензиите на полуостровот и подобрување на меѓусебните врски.

Пјонгјанг досега изведе три нуклеарни тестирања, а последниот во низата беше изведен во февруари 2013 година, но неодамна се закани дека ќе го изведе и четвртиот. Последната проба наиде на осуда и од Кина, нејзиниот главен дипломатски сојзунил, и се наоѓа под санкции на Обедиентите нации кои забрануваат трговија преку која би можело да се финансира неговата програма.

Пренебрегнувајќи ги меѓународните предупредувања, Северна Кореја во февруари 2013 година ја изврши својата трета нуклеарна проба, детонирајќи направа со поголема ударна моќ од употребената претходно при втората нуклеарна проба од 2009 година.

Исто така, тврди дека остварила напредок и во минијатуризирањето на атомската бомба, што е клучен предуслов при изработка на боева глава за балистичките проектили. Во текот на 2014 година, пак, Пјонгјанг изврши лансирање на стотици проектили со краток и среден дострел, што предизвика вознемиреност на американските сојузници во регионот.

Институтот за наука и меѓународна безбедност (ISIS), со седиште во Вашингтон, минатата 2014 година објави дека се чини оти севернокорејскиот нуклеарен реактор е ставен во мирување. Меѓутоа, ISIS на почетокот од септември годинава тврдеше дека сателитското надзирање спроведено изминатава зима открило „знаци“ на активност со слаб интензитет, како што е топењето на снегот на ѕидовите од реакторот и турбините. Институтот споменува и истекување млаз топла вода од реакторот, како и појава којашто наликува на пареа која се подига од зградата во којашто се наоѓа турбината.

Реакторот Јонгбјон беше затворен во 2007 година во рамките на договорот за разоружување во замена за помош во храна., но Северна Кореја започна работи на реновирање по последниот нуклеарен тест во 2013 година.

Северна Кореја, којашто повремено се заканува со нуклеарен напад врз САД и редовно го обвинува Вашингтон дека ги користат воените вежби во соседна Јужна Кореја како провокација за започнување нуклеарна војна и во 2013 година објави дека се повлекува од примирјето со Вашингтон, со кое беа завршени непријателствата во Корејската војна која траеше од 1950 до 1953 година.

Двете Кореи технички и натаму се во војна, бидејќи нивната тригодишна војна заврши со примирје а не со формален мировен договор./крај/мф/сн

Извор: Макфакс