Северна Кореја објави во неделата дека успешно во орбитата поставила сателит со ракета со долг дострел, а од светот пристигнуваат осуди за тоа што оваа активност на Пјонгјан го сметаат за тестирање на балистичка ракета со долг дострел со која изолираната комунистичка земја ги прекршила санкциите и резолуциите на Обединетите наци за што на вонредна седница ќе расправа нивниот Совет за безбедност.

Северна Кореја ја лансирала ракетата од својот лансирен комплекс Донгчанг-ри во неделата во 9,31 часот по локално време. Водителката на државната севернокорејска телевизија најави дека лансирањето лично го одобрил лидерот Ким Јонг-Ун, што „овозможи успешно во орбитата да го поставиме нашиот сателит за набљудување на Земјата ’Кванменсон-4’“.

Генералниот секретар на ОН, Бан Ки-Мун побара од Северна Кореја да го „прекине своето провокативно дејствување. Во соопштението Бан оценува „дека заслужува жалење лансирањето со коешто според него се кршат резолуциите на ОН и го „повторува апелот до Северна Кореја да прекине со провокативните активности и да ги почитува меѓународните обврски“. Генералниот секретар ја истакнува „својата подготвеност да работи со сите страни на смирување на тензиите и на проверливо намалување на нуклеарното вооружување на Корејскиот полуостров“.

Советот за безбедност на ОН ќе одржи вонредна седница поради севернокорејското лансирање на ракета со долг дострел, соопшти во неделата јужнокорејското министерство за надворешни работи. Јужна Кореја, Јапонија и САД побараа итно свикување на седницата на Советот. „Треба да се одржи во Њујорк во недела во 11 часот по локално време“, соопшти Сеул. Петнаесетте членки на Советот за безбедност на ОН од претходно подготвуваат резолуција со којашто ќе ја казнат Северна Кореја поради четвртото нуклеарно тестирање изведено на 6-ти јануари годинава.

Јужнокорејските и американските функционери од одбраната одлучија да започнат официјални преговори за распоредување за распоредување на Корејскиот полуостров на американски систем за противвоздушна одбрана на што остро се спротистави Кина, објави во неделата јужнокорејското министерство за одбрана.

„Одлучено е официјално да бидат отворени преговорите за можноста за распоредување на системот THAAD (Terminal High Altitude Area Defense) во рамките на напорите за јакнење на противракетната одбрана на сојузот Јужна Кореја – САД, изјави Рју Је-Сеунг, висок функционер во јужнокорејското министерство за одбрана.

САД ветија дека ќе ги преземат сите потребни мерки за да се одбранат самите и своите сојузници, и предупредија на сериозни последици за Пјонгјанг. „Севернокорејското лансирање со користење балистичка ракетна технологија… претставува уште едно дестабилизирачко и провокативно дејствување, и е очигледно кршење на повеќе резолуции на Советот за безбедност на ОН, изјави американската советничка за национална безбедност, Сузан Рајс во соопштение.

„САД се предадени на сигурноста на своите сојузници во регионот и ќе ги преземеме сите неопходни чекори за да се одбраниме себеси и своите сојузници, и да одговориме на севернокорејските провокации. Ја повикуваме меѓународната заедница да застане единствено и да ѝ покаже на Северна Кореја дека нејзините непромислени акции мора да имаат сериозни последици“, додава Рајс.

Лансирањето на севернокорејската ракета со долг дострел „претставува провокативен чин кој не се простува“, изјави јужнокорејската претседателка Пак Кин-Хе и го повика Советот за безбедност на ОН брзо да донесе строги санкции за соседната земја. Парк тврди дека владата во Пјонгјанг се обидува да ја зајакне својата способност само за да го одржи својот режим.

Комунистичка Северна Кореја е една од најизолираните земји на светот, а нејзиниот главен партнер е Кина којашто, исто така, „изрази жалење“ поради лансирањето. Пјонгјанг „има право на мирновременско користење на Вселената, но тоа права го ограничуваат соодветните резолуции на Советот за безбедност на ОН“ и Кина „го изразува своето жалење“, изјави Хуа Чунјинг, портпаролка на кинеското министерство за надворешни работи во изјавата на официјалната интернет страница на министерството.

Москва истакна дека Пјонгјанг не ги послушал повиците на меѓународната заедница, уште еднаш демонстрирајќи пркосно непочитување на меѓународното право, но индиректно предупредува дека таквите севернокорејски активности ќе бидат во полза на политиките на САД во регионот.

„Очигледно дека таквите активности ќе доведат до сериозно влошување на ситуацијата на Корејскиот полуостров и во Североисточна Азија во целина, одејќи им на рака на оние кои се фокусираат на политиката на блокови и на зголемување на воените конфронтации, нанесувајќи им сериозни штети на безбедноста на земјите во регионот, во прв ред на самата Северна Кореја“, се вели во соопштението објавено на официјалната страница на руското министерство за надворешни работи.

Јапонскиот премиер Шинзо Абе ги осуди севернокорејското лансирање на ракета со долго дострел и покрај предупредувањата на меѓународната заедница. Тоа лансирање е „апсолутно недозволиво“, изјави Абе за новинарите оценувајќи дека станува збор за „чисто кршење“ на резолуцијата на Советот за безбедност на ОН. Како што беше објавено претходно, Јапонија не се обиде да ја урне ракетата на Северна Кореја, иако таа прелетала преку јужниот јапонски остров Окинава. /крај/мф/сн

Извор: Макфакс