САД ги засилија во петокот санкциите против Северна Кореја, кои се протолкувани како одговор на кибернетичкиот напад врз компанијата „Sony Pictures“ поради комедијата „Интервју“ за убиството на младиот комунистички севернокорејски челник Ким Јонг-Ун, но еден неименуван функционер во Вашингтон изјавил дека тие не се поврзани со овој случај, откако минатата седмица јапонските медиуми објавија дека американските истражни органи имаат сигнали дека нападите дошле преку јапонски сервери.
 

САД ги засилија во петокот санкциите против Северна Кореја, кои се протолкувани како одговор на кибернетичкиот напад врз компанијата „Sony Pictures“ поради комедијата „Интервју“ за убиството на младиот комунистички севернокорејски челник Ким Јонг-Ун, но еден неименуван функционер во Вашингтон изјавил дека тие не се поврзани со овој случај, откако минатата седмица јапонските медиуми објавија дека американските истражни органи имаат сигнали дека нападите дошле преку јапонски сервери.

Новите санкции се одговор на многубројните провокации од страна на Пјонгјанг и особено неодамнешниот информатички напад врз „Sony Pictures“ и заканите за кино салите и гледачите, пренесува AFP повикувајќи се на соопштението на министерството за финансии на САД.

Белата куќа, пак, во одделно соопштени предупредува дека станува збор само за прв дел од американскиот одговор, без да наведе кои би биле следните чекори.

Меѓутоа, Reuters го пренесува мислењето на високи функционери во американската администрација дека најновите санкции не се директно поврзани со кибернетичкиот напад врз „Sony Pictures“.

Компанијата „Sony Pictures Entertainment“, којашто е филијала на јапонската корпорација „Sony“, според Вашингтон беше цел на севернокорејски напад, а федералната американска полиција FBI официјално ја обвини Северна Кореја во врска со организирањето на хакерскиот напад врз „Sony Pictures Entertainment“ и заканите во врска со најавената премиера на сатиричната комедија „Интервју коешто убива“ во коешто се случува атентат врз младиот севернокорејски челник Ким Јонг-Ун и се исмејува комунистичкиот режим во Пјонгјанг.

Откако дистрибутерите и компанијата првично поради заканите од хакерите дека ќе организираат „слични напади како оние од 11-ти септември 2001 година“ врз кината во САД се откажаа од прикажување на филмот, тој сепак беше прикажан во 300 независни кино сали во Америка, како и на интернет, вклучително и на ресурсот YouTube.

Меѓутоа, на 26-ти декември јапонската телевизија TBS објави дека американското Федерално биро за истраги (FBI) на надлежните јапонски органи им ја предало информацијата за IP адреси, аналогот од виртуелниот простор на поштенските адреси во реалниот живот, коишто биле користени за кибернетичкиот напад врз „Sony“, бидејќи постојат сомневања дека хакерите ги користеле јапонските интернет сервери. Според телевизијата, FBI побарало соработка од соодветните органи во Јапонија, бидејќи се појавила можноста дека во кибернетички напади се користат јапонските мрежи и побарало ангажирање на истражните органи на Земјата на изгрејсонцето. Јапонските органи веќе контактирале со централата на „Sony“ и работат на утврдување на сопствениците на адресите, се додава во информацијата.

САД, коишто и натаму за споменатиот хакерски напад го обвинуваат Пјонгјанг, на листата за санкции ги додадоа имињата на десет државни функционери, севернокорејската разузнавачка служба и две компании поврзани со воениот сектор, објави американското министерство за финансии.

Овие санкции се донесени на основа на декретот на американскиот претседател Барак Обама и одразуваат ставот на САД дека Северна Кореја ја сметаат одговорна за деструктивни и дестабилизирачки активности, изјави американскиот министер за финанси Џејкоб Луи во соопштение и додаде дека тие ќе употребат „широка лепеза“ од акции за одбрана на американските компании и граѓани, како и за одбрана од напади врз американските вредности./крај/мф/сн

Извор: Макфакс