Американскиот Стејт департмент објави преку својата служба за односи со јавноста во четвртокот низа материјали коишто се однесуваат на напорите за запирање на повеќе од пет ипол годишната војна во Сирија, меѓу другото и договорот со Русија за намалување на насилствата, воспоставување на (хуманитарниот) пристап и формирање Заеднички извршен центар, на чие објавување инсистираше Москва, пренесуваат агенциите.

Досега на повиците од Москва, САД да се согласат јавно да биде објавен заедничкиот документ кој пред две седмици по петнаесетчасовни преговори во Женева го постигнаа шефовите на дипломатиите на двете земји Џон Кери и Сергеј Лавров, од Вашингтон одговараат дека не сметаат оти е неопходно да се објават детали од договорот кои се „премногу чувствителни“ за да им се дава публицитет.

„Руската Федерација и САД имаат намера да преземат заеднички напори со цел да се стабилизиран ситуацијата во Сирија со примена на посебни мери во покраината Алепо“, се вели во текстот од договорот.

Во него се истакнува, исто така, дека „поделбата на териториите, кои се под контрола на екстремните сунитски организации Исламската држава и Џебхат ан-Нусра (сириското крило на Ал Каеда коешто го смени името во Џебхат Фатх ал-Шам), како и под контрола на силите на умерената опозиција, остануваат приоритет“.

Се нагласува и дека сириското воено воздухопловство нема да дејствува во областите во кои се активни терористичките групации, туку воздушните удари врз нивните позиции ќе ги изведуваат САД и Русија.

Во материјалите се наведува дека сите учесници во договорот за запирање на борбените дејствија, „започнувајќи од денот Д“ (12-ти септември) се должни да ги избегнуваат судирите во рок од следните 48 часови. Доколку примирјето се одржи два дена, страните „ќе го продолжат“, договарајќи се за нови рокови.

Договорот предвидува, меѓу другото, создавање демилитаризирана зона во близина на автопатот Кастело крај Алепо. Москва и Вашингтон во рамките заедничкиот центар ќе носат одлуки за мерките против оние сили кои ќе ја нарушат оваа демилитаризирана зона.

Се утврдуваат, исто така, и дејствијата на вооружената опозиција којашто во сирискиот конфликт ја поддржуваат САД наспроти Русија која е сојузник на владата претседателот Башар ал-Асад во областа на автопатот Кастело. Особено, се истакнува дека сириската армија треба да ги повлече оклопните возила и војниците, задржувајќи само две контролни точки. Активностите на бунтовниците, пак, ќе треба да зависат од единиците на сириските Курди, доколку тие „отидат на 500 метри јужно од патот Кастело“, опозициските групи треба да го сторат истото.

Покрај тоа, се гарантира безбедноста на сите кои сакаат да го напуштат Алепо користејќи го патот Кастело, вклучително и бунтовниците, кои всушност се опкружени во неколку квартови на истоимениот втор по големина сириски град. Во договорот се укажува и дека бројот на опозициските борци кои го напуштаат Алепо, и вооружувањето коешто ќе го понесат ќе биде усогласено со Обединетите нации.

Сириската армија во понеделниот 19-ти септември, една седмица по започнувањето на прекинот на огнот, објави крај на примирјето коешто траеше една седмица, како што беше објавено дека е договорено меѓу Русија и САД, обвинувајќи ги бунтовничките групи кои ги поддржува Вашингтон за неуспехот да се одржи прекинот на огнот.

„Сириската армија објавува прекин на огнот кој започна на 12-ти септември во 19 часот во согласност со руско-американскиот договор. Се претпоставуваше дека режимот на прекин на огнот претставува реална шанса да се стави крај на крвопролевањето, но истовремено терористите (како што официјален Дамаск ги именува сите бунтовнички групи – з.р.), не се придржуваа до ниедна од точките на договорот за прекин на огнот, а бројот на нарушувањата од нивна страна надмина 300“, соопшти тогаш командата на сириската армија.

„Сириските воени сили имаа најголем степен на самоконтрола и покрај кршењето на примирјето од страна на терористичките групи. Вооружените сили ја потврдуваат својата намера и решителност да продолжат со борбата против тероризмот за да ја вратат сигурноста и стабилноста во Сирија“, порача сириската армија.

Руското министерство за одбрана соопшти оти смета дека се мали шансите дека примирјето ќе продолжи. „Имајќи предвид дека бунтовниците не ги почитуваат условите за примирјето, сметаме дека е бесмислено сириската војска да го спроведува еднострано“, порача генерал-полковникот Сергеј Рудској. Според него, главниот проблем е што бунтовниците коишто ги подржуваат САД не се одвоија од Џебхат ан-Нусра, бунтовничка група која дејствува како сириски огранок на Ал Каеда, а минатиот месец се преименуваше во Џабхат Фатетех ал-Шам./крај/мф/сн

Извор: Макфакс