Американските избирачи се длабоко скептични кога станува збор за интегритетот на избирачкиот апарат и процес во САД и повеќе од секој четврти од десетмина веруваат дека претседателските избори на 8-ми ноември би можеле да му бидат украдени како резултат на голема изборна измама на кандидатот на Републиканската партија, Доналд Трамп, покажуваат резултатите од истражувањето на јавното мнение објавени во понеделникот.

Според анкетата што ја спровела агенцијата на компанијата Morning Consult за американскиот политички портал Politico, 41 отсто од гласачите сметаат дека претседателските избори ќе бидат наместени на штета на Доналд Трамп. Изборна кражба очекуваат 73 отсто од републиканците, кои истакнуваат дека целосно се согласуваат со повеќекратните предупредувања на Трамп дека се подготвува изборна измама, додека само 17 отсто од демократите го споделуваат таквото мислење.

Истражувањето било спроведени на примерок од 1.999 регистрирани гласачи, во периодот од 13-ти до 15-ти октомври.

„Резултатите покажуваат дека избирачите сé помалку веруваат дека гласовите ширум земјата ќе бидат соодветно преброени на изборниот ден“, коментира главниот истражувач во Morning Consult, Кајл Дроп.

Истражувањето покажува и дека 50 отсто од демократските гласачи веруваат дека Русија се обидува да влијае врз американските избори, додека тој процент меѓу републиканците изнесува 32 отсто. Исто така, речиси половината од приврзаните на републиканскиот кандидат, или 49 отсто, сметаат дека Русија е пријателска земја или сојузник. Истовремено само 19 отсто од приврзаниците на демократската кандидатка Хилари Клинтон имаат позитивно мислење за Русија.

Во текот на изминатата седмица Доналд Трамп ја интензивираше својата критика на американскиот изборен систем. Тој предупреди дека избирачкиот процес е лажиран, и обвини дека медиумите се во дослух со неговата противничка Хилари Клинтон, со цел да ѝ обезбедат победа.

Во неделата Тремпп повторно го одведе во прашање легитимитетот на изборите во САД, велејќи дека верува оти гласањето е веќе „наместено“ на повеќе избирачки места.

„Изборите се апсолутно наместени од страна на нечесните и клеветнички медиуми која ја поддржуваат Клинтон, но исто така и на многу избирачки места во САД“, напиша републиканскиот кандидат на Twitter.

Ден претходно на собирот во Њу Хемпшир Трамп ги обвини „корумпираните“ медиуми за манипулации „со целосно лажни обвинувања“ врз него во полза на Клинтон.

Од изборниот штаб на Хилари Клинтон, ги отфрлија ваквите обвинувања од противкандидатот и наведоа дека не постои ниеден доказ за местење на изборите.

„Трамп сфати дека губи и сега за својот пораз се обидува да го обвини системот. Така тоа го правата губитниците“, изјави Роби Мок, менаџер на кампањата на Хилари Клинтон, којашто во анкетата сé уште има солидна предност од седум процентни поени.

Белата куќа во понеделникот преку портпаролот Џошуа Ернест порача дека не се сомнева оти претстојните претседателски избори ќе бидат чесни, одговарајќи на новинарско прашање дали се согласува со стравувањата на републиканскиот кандидат дека изборите може да бидат лажирани.

„Не воопшто…, исто како и Мајк Пенс (кандидат на потпретседател на Републиканската партија – з.р.) и Пол Рајан (челник на републиканците во Претставничкиот дом), коишто веќе изразија увереност дека изборите ќе бидат фер“, одговори Ернест, пренесува Reuters.

„Видовме такви обвинувања и претходно, но при обид да се направи анализа и истражување, тие немаа потврди“, истакна портпаролот на Белата куќа. Според Ернест, претседателот Барак Обама е целосно уверен во компетенцијата на ние коишто се одговорни за спроведување на изборите, како и оти тие ќе бидат транспарентни и чесни./крај/мф/сн

Извор: Макфакс