Американскиот претседател Барак Обама и кинескиот претседател Кси Џинпинг во саботата своите земји ги приклучија на Парискиот договор за климатските промени, со што значително се зајакнуваат глобалните напори во борбата против климатските промени, оценуваат агенциите.

Во пресрет на почетокот на самитот на земјите од групата Г20 во кинескиот град Ханжу, кој ќе се одржи во недела и понеделник, челниците на САД и на Кина, Барак Обама односно Кси Џинпинг на генералниот секретар на Обединетите нации, Бан Ки-мун му ја предале писмената потврда дека нивните земји им пристапуваат на Парискиот договор за климатските земји. Државите од Г20 се одговорни за емисија на 80 отсто од штетните гасови во атмосферата.

„Потегот на двете земји, кои се најголемите загадувачи, сторен истовремено и рано, би требало да ги поттикне и другите земји поскоро да преземат нешто во овој правец“, изјавил советникот во Белата куќа за климат, Брајан Диз, пренесува агенцијата DPA.

Американскиот претседател Обама најави дека прашањето за климатските промени ќе биде еден од клучните делови на неговата последна азиска турнеја и на самитот на Г20 во Кина. Пред да допатува во Кина, тој го посети поморскиот резерват во Пацифик и се сретна на Хаваи со челниците на островските нации кои најмногу ги трпат последиците од климатските промени. Обама претходно донесе одлука значително да се прошири заштитената океанска област Папаганаумокуакеа на Хаваи познато по многуте морски видови, морски желки и до милиони морски птици, односно да се забрани комерцијалниот рибилов.

Претхотно во саботата службената новинска агенција Xinhua јави дека кинескиот парламент го ратификувал Парискиот договор за климатските промени, што е потег во полза на настојувањата овој договор да стапи на сила до крајот на годинава. Постојаниот комитет на Секинескиот народен конгрес гласал за прифаќање на „предлогот за разгледување и ратификување на Парискиот договор“, на затворен состанок на редовната седмична седница, пренесува агенцијата.

Државите од Г20 се одговорни за 80 отсто од глобалната емисија на гасовите коишто го предизвикуваат ефектот на стаклена градина, односно климатското загревање на планетата. САД, кои се вториот светски емитер на овие гасови, исто така, би требало да го ратификуваат договорот во обидите тој да стапи на сила до крајот на годинава.

Претставниците на околу 200 држави се договорија ланскиот декември во француската престолнина Париз за тоа да се намали емисијата на ткн стакленички гасови, како и да се задржи порастот на глобалната температура на под 2 Целзиусови степени.

Експертите предупредија дека веќе се заканува опасноста од надминување на оваа одредена температура, а агенцијата на Обединетите нации наведува дека 2016 година најверојатно ќе стане најтоплата година од почетокот на регистрирањето на овие податоци, и оти веќе ја надминала минатата 2015 година.

Додека 180 земји го потпишаа договорот, 55 држави коишто покриваат најмалку 55 отсто од глобалната емисија на гасовите треба формално да го ратификуваат договорот за да добие правна сила. Пред Кина и САД, 24 земји го ратификуваа договорот, а меѓу нив и Северна Кореја, но на сите нив заедно отпаѓа само 1,8 отсто од вкупната емисија на стакленичките гасови, според податоците од Рамковната конвенција на ОН за климатските промени.

Кина е одговорна за повеќе од 20 отсто од вкупната емисија, додека САД покриваат уште 17,9 отсто. Русија, пак, е одговорна за 7,5 отсто а Индија за 4,1 отсто од глобалната емисија на стакленичките гасови.

Договорот ќе стапи на сила 30 дена откако ќе го ратификуваат 55-те земји одговронби за повеќе од половината на емисијата на штетните гасови. Земјите кои го ратификуваа договорот ќе мораат да чекаат три години откако тој ќе стапи на сила пред да можат да го започнат процесот на повлекување од него, според договорот потпишан во Париз./крај/мф/сн

Извор: Макфакс