САД се подготвени да разместат во седум европски земји 250 оклопни возила, изјави во вторникот американскиот министер за одбрана Ештон Картер за време на посетата на Талин, додека истовремено во Брисел американскиот амбасадор при НАТО Даглас Лут изјави дека Вашингтон ќе распореди во шест земји од Источна Европа бригада со оклопни возила, вклучително и тенкови и артилерија, кои ќе учествуваат во вежби во регионот, пренесуваат агенциите.

Овие најави од американските функционери доаѓаат во периодот на најголемото заладување на односите меѓу Западот и Русија по крајот на Студената војна, поради украинската криза. САД за своите сојузници од НАТО во источна Европа и на Балтик нуди поддршка за да ги смири нивните стравувања од наводна можна руска агресија. Но Москва, тоа го смета како изговор за приближување на Алијансата до руските граници, и одговори со најава дека ќе го зголеми својот нуклеарен арсенал за одвраќање со 40 дополнителни интерконтинентални балистички проектили.

„САД превентивно ќе разместат во седум европски земји 250 тенкови, оклопни возила и друга воена опрема. Единиците во обем на чети или баталјони ќе бидат разместени, првично привремено во Бугарија, Естонија, Литванија, Латвија, Полска, Романија и Германија“, изјави челникот на Пентагон, Ештон Картер, на прес-конференцијата во Талин.

Според Картер, за извршување на воените вежби би било најдобро споменатата воена опрема да биде стационирана во европскиот регион.

Американскиот министер за одбрана од понеделникот во Берлин ја започна својата европска турнеја којашто ќе трае до петок, 26-ти јуни. Во вторникот Картер престојува во Естонија, од каде што ќе замине во Брисел на состанокот на министрите за одбрана на земјите членки на НАТО, којашто ќе се одржи во среда и четврток во Брисел.

Во слична насока зборуваше во Брисел во вторникот и американскиот амбасадор во НАТО. Даглас Лут најави дека САД во земјите од Централна и Источна Европа ќе распоредат бригада од оклопни возила и артилерија, коишто ќе учествуваат на воени маневри во регионот.

„Државниот секретар (за одбрана) Ештон Картер денеска објави дека има намера превентивно да размести, да прекомандува воена група со бригаден состав, којашто ќе вклучува тенкови, оклопни возила, механизирана артилерија, во Централна и Источна Европа за поддршка на засилените програми за вежби, коишто ги спроведуваме веќе една година“, истакна амбасадорот во разговор со новинарите во Брисел.

Истакна дека „таа бригада ќе биде распоредена во шест сојузнички од НАТО“.

„Тие привремено ќе бидат сместени во близина на местата каде што ќе се одвиваат вежбите. Тоа е поефикасен начин за спроведување на ротирачкото постојано присуство. Војниците коишто ќе учествуваат во вежбите едноставно ќе долетаат и ќе приклучат на маневрите“, изјави американскиот амбасадор во Алијансата.

САД досега официјално не објавија каде во Европа ќе биде стационирана таа опрема, но медиумите повикувајќи се на високи извори, пишуваат дека и самото планирање предизвикало бесна реакција на Москва.

Претставник на руското министерство за одбрана изјави дела распоредување на тенкови и тешко вооружување во членките на земјите на НАТО на руските граници, е најагресивниот американски чин на САД од крајот на Студената војна.

Вашингтон во понеделникот вети дека ќе придонесе со специјални единици, разузнавачки информации и друга софистицирана опрема за следење и шпионирање за новите сили на НАТО за брз одговор коишто се замислени за одвраќање на наводната руска агресија./крај/мф/сн

Извор: Макфакс