Нападите на авијацијата на коалицијата предводена од САД во Деир-ез-Зор во кој според последните податоци во саботата вечерта биле убиени 80 сириски владини војници, биле изведени со верување дека се напаѓа џихадистичката Исламска држава, а не позиции на сириската армија, соопшти Централната команда на Вооружените сили на САД (CENTKOM), додека Пентагон соопшти дека нападот бил преземен врз основа на податоци од американското разузнавање. 

Неименуван извор од американското министерство за одбрана за Reuters рекол дека нападите траеле околу половина час, почнувајќи од 11 часот по источноамериканско време, односно 17 часот по македонско.

Според изворот, американската војска дејствувала поаѓајќи од сопствени разузнавачки податоци и потенцијалните цели ги следеле неколку дена.

Опозициската Сириска опсерваторија за човекови права (SOHR), објави ноќта кон недела дека според нејзините сознанија, во коалицискиот напад загинале 80 сириски војници. Претходно Дамаск потврди дека загинале 62 војници, а SOHR извести за 30 до 35 убиени. Опсерваторијата, исто така, предупредува дека со овој напад за борците на Исламската држава е отворен патот за заземање на позициите кај Џабел Тард, пренесува AFP.

„Претходно во саботата, авијацијата на коалицијата изврши напади јужно од Деир-ез-Зор во Сирија. Силите на коалицијата беа уверени дека напаѓаат позиција на Исламската држава, која ја набљудуваа подолго време пред преземање на нападот“, се наведува во соопштението на американската команда испратено до руската агенција ТАСС.

Во него, исто така, се истакнува дека налетите биле „веднаш сопрени“ откако командата на коалицијата „добила од рускиот претставник информација, според која опремата која е нападната и составот може да припаѓа на сириската армија“.

Притоа во CENTKOM истакнуваат дека во оваа област претходно изведувале бомбардирања. Покрај тоа, според војската на САД, коалицијата наводно „ги известила своите руски партнери за претстојниот напад“.

Руското министерство за надворешни работи веднаш негираше дека руската страна била информирана за претстојниот напад, и истакнува дека дури и во американското соопштение се признава дека таквата практика не се користи често.

Началникот на Рускиот центар за примирјето во Сирија, Владимир Савчено изјави за агенцијата РИА дека два авиона „F-16“, два авиона од типот „А-10“ и американско ударно беспилотно летало нанеле воздушни удари врз клучни објекти на одбраната на сириската армија во близина на Деир-ез-Зор, во истоимената покраина, и оти нападите биле прекинати по 50 минути.

Пред него портпаролот на руското министерство за одбрана, генерал-мајор Игор Конашенков изјави дека коалициските летала влегле во сирискиот воздушен простор од соседен Ирак.

Сириската армија соопшти дека во време на нападот врз аеродромот крај Деи-ез-Зор нејзините единици биле во опсада на џихадистите на Исламската држава, кои по воздушните удари од коалицијата предводена од САД веднаш преминале во офанзива, сметајќи го тоа за доказ дека коалицијата ја помага оваа терористичка групација.

Во меѓувреме сириската опозициска групација Хмејм соопшти дека по овој напад, очекува жесток реакција од страна на Русија. Москва од своја страна веќе свика итна седница на Советот за безбедност на ОН, која треба да започне во 1 часот во недела по македонско време./крај/мф/сн

Извор: Макфакс