Вашингтон не ја исклучува можност од воздушни удари против силите на владата во Дамаск, и покрај тоа што се сомнева дека тоа е во интересот на САД, изјави за новинарите во четвртокот портпаролот на Белата куќа, Џошуа Ернест, додека руското министерство за одбрана преку портпаролот Игор Конашенков порача дека радиусот на противвоздушните системи С-300 и С-400 може да бидат изненадување за некои неидентификувани објекти.

„Воената акција против режимот на (сирискиот претседател Башар ал-)Асад со цел да се реши ситуацијата во Алепо е малку веројатно дека ќе ги постигне целите, кои на многумина им изгледаат сега, во смисла на сопирање на насилствата. Многу поверојатно е дека тие ќе доведат до многу непредвидени последици, коишто сосема не се во согласност со нашите национални интереси“, изјави на брифингот со новинарите во Белата куќа, портпаролот Џош Ернест, пренесе агенцијата РИА.

Претходно повеќе американски медиуми, повикувајќи се на различни извори, пренесоа дека САД ја разгледуваат можноста во Сирија да преземаат и удари врз објекти на владината армија.

Руското министерство за одбрана објави дека сметаат оти ваквите „истекувања“ на информации во западните медиуми од пред неколку дена може да се вовед во вистинска акција и им препорачаа на „колегите во Вашингтон внимателно да ги пресметаат можните последици од реализацијата на тавите планови“.

„Дозволете ми да ги потсетам американските ‘стратези’ дека воздушното покривање на руските воени бази во Хмејмим и Тартус се извршува со ракетните системи С-400 и С-300, чијшто радиус може да дојде како изненадување за кој и да е неидентификуван летачи објект“, изјави портпаролот на русото министерство за одбрана генерал-мајорот Игор Конашенов.

Истакна дека борбените екипажи на руските противвоздушни системи „тешко дека ќе имаат време да ја разјаснат по ‘директната линија’ точната траекторија на летот на ракетите и припадноста на нивните носители“.

„А сите илузии на дилетантите за постоењето на ‘невидливите’ авиони може да се соочат со разочарувачката реалност“, порача Конашенков.

Портпаролот на русото министерство за одбрана посочи дека на сите „вжештени глави“ по нападот врз сириската војска од страна на меѓународната коалиција предводена од САД кај Деир-ез-Зор кога беа убиени 83 сириски војници а ранети над 100, Москва ги преземала сите мерки за да се избегнат вакви „грешки“ против руските сили во Сирија.

САД ја прекинаа соработката со Русија во обидот за постигнување прекин на огнот во Сирија претходно седмицава обвинувајќи ја Москва за нејзината помош на сириските владини сили во офанзивата во Алепо, но американскиот државен секретар Џон Кери и рускиот министер за надворешни работи Сергеј Лавров и натаму одржуваат телефонски консултации.

Вашингтон ја обвинува Москва дека не ги исполнува своите меѓународни обврски во Сирија, додека руската страна возвраќа дека САД не ја исполниле клучниот услов а тоа е да влијаат врз вооружената сунитска опозиција која ја поддржуваат да се дистанцира од екстремните исламистички групации кои се на листата терористички организации на Обединетите нации./крај/мф/сн

Извор: Макфакс