САД во неделата навечер објавија снимки за кои тврдат дека докажуваат оти од руска територија со артилерија се гаѓаат позиции на украинската армија, додека Русија одговори дека не станува збор за никакви докази и побара да се овозможи меѓународна истрага за украинските гранатирања на руските погранични премини и села.

Американскиот Стејт департмент по електронска пошта ги испратил споменатите снимки со коментар на DNI, бирото на директорот на американската разузнавачка служба, кои служат како „доказ дека Русија ја гаѓа Украина“, за да ги поддржи проруските бунтовници во источниот дел на соседната земја. Четирите снимки прикажуваат делови од руско-украинската граница. Според објаснувањето на DNI, две покажуваат група повеќецевни ракетни фрлачи и група самоодни хаубици за кои американската влада тврди дека се руски системи на руска територија. На сателитските снимки, исто така според појаснувањето, се гледа и кратер во близина на воени позиции на украинската страна од границата. На третата е тешко вооружување наводно од Русија за кое Вашингтон вели дека проруските бунтовници го довлекуваат од внатрешноста на Украина. САД претходно во четвртокот објавија дека поседуваат докази дека Русија ги гаѓала украинските сили од својата територија. „Москва, покрај тоа, планира на бунтовниците да им испрати потешки и посилни ракетни фрлачи“, изјави заменичката на портпаролот на Стејт департментот, Мари Харф, повикувајќи се на американски разузнавачки извори. Според неа, американските информации говорат дека и по уривањето на малезискиот патнички авион на 17-ти јули, „оружјето и натаму ја минува границата кон Украина“. Непосредно пред соопштението на американскиот Стејт департмент, во неделата министерството за одбрана на Русија издаде соопштение дека во последните четири месеци на границата меѓу Русија и Украина, на руската страна се извршени 18 воени инспекции и набљудувања од воздух при што „не регистрирано прекршување или непријавена воена активност“. Руската дипломатија, исто така, во неколку наврати изјавуваше дека Русија не е страна во внатрешниот конфликт во Украина, а обвинувањата за гранатирањата на украинската територија од руската за „неосновани инсинуации“. Веднаш во неделата се огласи со реакција и руската Државна дума, којашто снимките што ги обелодени Стејт департментот ги карактеризираше како „уште еден од постојаните нејасни извештаи за наводно гаѓање на Украина од руска територија“.Според заменикот претседател на руската парламентарна комисија за одбрана, Франц Клинцевич, САД пласираат „очигледни лаги“. Според парламентарецот, снимките од американските сателити се недоволни за обвинување на Русија за гаѓање на Украина, бидејќи за такво утврдување потребни се податоци и од други системи. „Денешната изјава на Американците едноставно е без докази“, заклучува Клинцевич и додава дека тој не поседува „информации за гранатирање од руска територија“. Според него, имајќи ја предвид густата населеност на пограничната област од украинската страна потребни би биле „хируршки прецизни удари“.Тој потсетува дека во последно време зачестиле гранатирањата врз руските погранични области од територијата на Украина во воените дејствија коишто ги спроведуваат украинските сили во источниот дел од земјата. „Поради тоа што деновиве ја гаѓаат нашата територија, јас генерално сум поборник на идејата да се испрати едно екстремно предупредување. Како што велат повеќе мои колеги, да се нанесат прецизни удари за да бидат уништени само системите за ракетен артилериски оган, за да биде испратена порака дека оној кој гаѓа може да настрада“, вели Клинцевич.Претходно седмицава шефот на руската дипломатија Сергеј Лаворв изјави дека при продолжување на нападите врз руската територија, во кои на почетокот од јули загина еден маж а две жени беа ранети, Русија може да одговори со гаѓање на позициите од кои е отворен огнот, како што тоа го прават Турција и Израел кога на нивните територии паѓаат проектили истрелани во сирискиот конфликт а тие ги гаѓаат најблиските позиции на сириската армија. Но притоа Лавров истакна дека инцидентите со гранатирањето на руската територија од Украина, Москва сѐ уште ги смета за резултат на непрофесионалноста во редовите на украинските сили или на случајност./крај/мф/сн

Извор: AFP/РИА Новости