Американските воени авиони бомбардирале во петокот во 12.45 часот по средноевропско време артилериски батерии на џихадистите од Исламската држава (IS), поранешната Исламска држава во Ирак и Шан (Левантот – Медитеранот – ISIL), кои биле користени против курдските сили коишто го бранат градот Ербил, објави во петокот портпаролот на американското министерство за одбрана.

Два ловци од типот „F/A-18“ истрелале ласерски наведувани проектили тешки 250 килограми врз подвижна артилериска единица кај Ербил, соопшти портпаролот на Пентагон, Џон Кирби. Додал дека исламските борци со таа гранатирале силите кои го бранат Ербил во кој се наоѓаат и околу 40 американски војници. „Одлуката за нападот ја донесе командантот на Здружената команда на американските сили врз основа на одобрување на Врховниот командант“, се наведува во соопштението на Кирби.

Американскиот претседател Барак Обама во четвртокот навечер ги одобри американските воздушни напади за да го спречи „можниот геноцид“ над стотици илјади припадници на малцинската шиитска заедница – језиди, коишто заедно со протераните христијани спасот од џихадистите го побараа во бегство во околните планини. САД, исто така, од воздух на бегалците им доставува помош во вода, храна и лекови.

Велика Британија најави дека на САД ќе им пружат „техничка помош“ во воздушното доставување на помош, но премиерот Дејвид Камерон ја исклучи секоја можност од британска воена интервенција.

Исламската дражва, најрадикалниот одметнат огранок на глобалната терористичка мрежа Ал Каеда, ја започна својата офанзива во Ирак на почетокот од јуни кога без речиси никакво отпор од странана ирачката армија освои големи области во северниот и централниот дел на земјата и продолжува со воените успеси и заземањето територии.

Сега е дефинитивно потврдено дека градовите како што се Каракош, во кој 99 отсто од населението беа христијани, Тилкаиф, Бартела и Карамлеш останаа без жители и дека се целосно под контрола на сунитските бутновнички групи и на џихадистите, вели во својот апел до меѓународната заедница монсињор Жозеф Тома, калдејскиот надбискуп за Киркук и Сулејманија, двата големи ирачки града во кои порано имаше значајни заедници на христијаните.

Ваквите напредувања ги овозможи и повлекувањето на борците на Курдите, коишто во меѓувреме добија и помош од своите сонародници од Турција и од Сирија, кои дојдоа во споменатите градови пред два месеца од ирачката автономна обалст Северен Курдистан. Нивното повлекување ги доведе џихадистите на само 30 минути возење од Ербил, главниот град на автономниот Курдистан, инаку регион богат со нафта. Американските и европските компании кои ги експлоатираат овие наоѓалишта наредија итна евакуација на својот персонал од градот.

Каракош е историски познат христијански град сместен меѓу Мосул и Арнила, главниот град на ирачки Курдистан. Има околу 50 илјади жители, но во него засолниште најдоа повеќе десетици илјади луѓе, откако пред два месеца џихадистите го заземаа вториот по големина ирачки град Мосул, од каде христијаните веднаш беа протерани. Тилкаиф, во кој исто така живееја многу христијани, но и припадници на малцинската шиитска заедница Шабак, исто така, во текот на само една ноќ опусти. Џихадистите, исто така, ги заземаа и помалите градови Махмур и Ал Кваир.

Калдејскиот патријарх Лиј Сако предупреди дека во бегство се повеќе од сто илјади христијани, додавајќи дека станува збор за вистинска и сериозна „хуманитарна катастрофа“. Според Сако, во Ирак бројката на христијани Ирак во моментов е повеќе од преполовена и изнесува 500 илјади верници, во однос на 1,2 милиони христијани пред американската инвазија во 2003 година, пренесе AFP.

Исламската држава соопшти дека нејзините припадници само во Ирак заземале 15 градови, како и стратешката брана Мосул на реката Тигар која е најголема во земјата, и две воени бази. Истакнувајќи го своето црно знаме на браната, џихадистите се закануваат дека можат да ги поплават најголемите ирачки градови или значително да го намалат испорачувањето на водата за пиење, како и на електричната енергија, пренесува Reuters повикувајќи се на очевидци./крај/мф/сн

Извор: Макфакс