Откако организацијата WikiLeaks во средата објави уште една серија од илјадници документи во врска со кампањата за претседател на САД на кандидатката на Демократската партија, Хилари Клинтон, а американските служби отворија истрага и натаму тврдејќи дека зад хакерските упади во политичките и други институции стои владата во Москва, рускиот претседател Владимир Путин повтори дека неговата земја не се обидува да влијае врз исходот од американските претседателски избори, какви што се обвинувањата од Вашингтон.

Минатата седмица по неформалните обвинувања од страна на највисоките американски функционери, администрацијата во Вашингтон официјално ја повини Русија за наводно покренување хакерска кампања со цел да се „меша во американскиот изборен процес“. Штабот на Хилари Клинтон, пак, во обвинувањата отиде чекор натаму и го обвини Кремљ дека сака да му помогне на републиканскиот кандидат Доналд Трамп во трката за Белата куќа.

WiiLeaks објави,меѓу другото, транскрипти од приватни разговори и електронска преписка на Џон Подеста, шеф на изборниот штаб на поранешната државна секретарка и актуелна кандидатка на Демократската партија за претседателските избори, Хилари Клинтон, во кои се наведуваат забелешките за интересите на Турција во конфликтот во Сирија, како и нуклеарна компанија поврзана со братот на Подеста која добила голем процент од американските резерви на ураниум во времето кога таа беше државен секретар, како и нејзините разговори со банкари од Волстрит каде вели дека тие се најкомпетентните да ги извршат реформите на американскиот финансиски сектор.

Американското Федерално биро за истраги (FBI) објави кон крајот на септември дека верува оти странски хакери ги нападнале серверите и мобилните телефони на членовите на Демократската партија, можеби и на избрани функционери.

WikiLeaks на почетокот од октомври објави илјадници пораки, вклучително и од најнов датум, откако претходно предизвика серија оставки во Националниот комитет на партијата DNC по објавувањето на непријатната преписка која покажа дека партиските челници имале валкана стратегија за елиминирањето на партискиот кандидат за претседателската номинација, сенаторот Берни Сандерс.

Подеста во средата отиде и чекор натаму и го обвини Доналд Трамп, дека е во директен дослух со Русија. Американските медиуми, пак, објавија дека безбедносните служби пред втората телевизиска дебата минатата седмица и на двајцата кандидата им презентирале документација која наводно покажува дека зад кибернетичките напади стојат руски хакери.

„Се занимавам со политика речиси педесет години. Ова е дефинитивно првата кампања во којашто морам да се занимавам со руските тајни служби, коишто, се чини, прават сé што можат за да му помогнат на нашиот ривал“, изјави Подеста.

Од Москва и претходно ваквите обвинувања ги карактеризираа како „глупости“ во кои нема факти и докази, и оти служат во кампањата на демократите во САД. Во средата по оваа тема се огласи првпат и рускиот претседател Владимир Путин кој рече дека американскиот скандал со наводното руско хакирање не е во интерес на Русија, како и дека сите страни во американската претседателска кампања ја злоупотребуваат реториката кон Русија за сопствени цели.

„Започнаа вистинска хистерија, тврдејќи дека ‘хакирањето’ е во интерес на Русија. Но тоа нема никаква врска со руските интереси“, изјави Путиn во интервјуто за француската телевизиja TF1.

Рускиот претседател рече дека владата во Москва ќе соработува со кој и да е победник на американските претседателски избори, „доколку, секако, новиот американски лидер сака да соработува со нашата земја“.

На американските обвинувања реагираше и рускиот министер за надворешни работи Сергеј Лавров кој како „ласкави“ ги оцени обвинувањата од САД дека Москва се меша во американскиот изборен систем и во резултатите, но додаде дека таквите обвинувања се смешни./крај/мф/сн

Извор: Макфакс