Припадници на полицијата во Сент Луис, во американската сојузна држава Мисури, смртно застрелале осомничен вооружен црн маж, објави во средата весникот St.Louis Post Dispatch, повикувајќи се на началникот на локалната полиција, а инцидентот предизвика нови расни протести и тензии започнати пред една година, кога во предградието Фергусон беше убиен невооружен црн тинејџер.

Според началникот на полицијата на Сент Луис, Сем Дотсон, инцидентот се случил кога службениците на органите за спроведување на редот дошле во куќата на осомничениот со налог за претрес. Во тој момент, од објектот истрчале две млади лица, а едниот маж насочил оружје кон полицајците.

„Она што ни е познато во овој момент, е дека некој вперил оружје кон полицајците, откако им наредиле да застанат во уличка зад куќата“, го цитира весникот началникот Дотсон. Истакнал дека станува збор за претрес во кварт познат по високата стапка на криминал.

Еден од полицајците трипати стрелал кон вооружениот маж, а друг истрелал во истиот правец уште еднаш. Вториот осомничен маж успеал да побегне. Идентитетот на убиениот засега не е утврден, но полицијата соопшти дека во инцидентот бил убиен афроамериканец на возраст од околу 20 години.

Полицијата го конфискувала оружјето на застреланиот, коешто според началникот било украдено, уште три пиштола, кокаин и крек, откриени во куќата. Според Дотсон, пред половина година полицијата веќе извршила претрес на истата адреса. Тогаш, исто така, открила неколку парчиња оружје кои сопственикот илегално ги поседувал.

„Полицијата трагаше по оружје, насилници, по лица кои се занимаваат со насилство во тој кварт“, рекол Дотсон.

Според St.Louis Post Dispatch, повеќе од стотина луѓе се собрале во близина на местото на инцидентот. Некои од нив изразиле сомневање во веродостојноста на изјавите на началникот на полицијата и започнале кошкање со полицајците протестирајќи против постапките на полицијата.

Интервентната полиција со оклопни возила побарала од масата да се разотиде, и притоа била приведена една од жените присутна меѓу групата граѓани на местото од убиството. Подоцна се приведени уште неколку демонстранти, пренесува Reuters.Инцидентот се случи десет дена откако Сент Луис беше преплавен со демонстранти од целата земја. Сент Луис и неговото предградие Фергусон беа местото од каде точно пред една година започнаа сеамериканските протести против полициската бруталност особено насочена кон расните малцинства. Повод за тоа беше убиството на невооружениот 18-годишен црнец Мајкл Браун, кој беше застрелан од 26-годишниот бел полицаец Дарен Вилсон, кој потоа не беше процесуиран.

Подоцна по серијата слични инциденти во кои смртно страдаа претежно млади припадници на афроамериканската заедница, ширум САД избувнаа масовни протести, кои неретко се претвораа во безредија и судири со полицијата, како што беше и овој август во Фергусон кога се одбележуваше годишнината од убиството на Мајкл Браун, што резултираше со неколкумина ранети и десетици приведени.

Ова убиство се случи, исто така, и точно една година откако полицијата во овој грд застрела уште еден афроамериканец, Кејџими Пауел./крај/мф/сн

Извор: Макфакс