САД објавија дека во понеделникот била завршена операцијата на уништување на море на хемиските супстанции преземени од владата на Сирија кои содржеа и сарин и нервни гасови, порачувајќи истовремено дека во иднина ќе внимава како Сирија ги исполнува преземените обврски од меѓународните договори за неширење на оружје за масовно уништување а истовремено американските воздухопловни власи им забранија на домашните компании да летаат преку сирискиот воздушен простор.

Најсмртоносното хемиско оружје што го поседуваше сирискиот режим е уништено, објавија ноќта кон вторникот американскиот претседател Барак Обама и министерството за одбрана. Уништените материи содржеле и сарин и иперит, два многу отровни боеви оружја. Неутрализирањето на супстанциите се одвиваше на американскиот брод „Cape Ray“ во меѓународните води во Средоземјето, откако минатата година во многу земји од регионот имаше протести поради стравувањата на инцидент со опасните материи.

Процесот, кој го предложи Русија со што на американскиот претседател Обама му овозможи безбедно да се повлече од најавениот воздушен на пад врз Сирија за што инаку немаше поширока поддршка, поради сé уште недокажана употреба на нервни отрови од страна на силите на владата на претседателот Башар ал-Асад, го надгледуваше Организацијата за забрана на хемиско оружје (OPCW).

Во телефонски разговор со капетанот на бродот, американскиот министер за одбрана Чак Хејгел го поздрави уништувањето на материите како „придонес за безбедноста на планетата“. Истовремено Обама најави дека САД ќе се погрижат „Сирија да ја исполнат својата обврска за уништување на преостанатите капаците за производство на хемиско оружје“. Меѓутоа, OPCW уште минатата година позитивно извести дека сириската влада учествувала во уништувањето на ваквите постројки и дека најголемиот дел од најсериозни такви капацитети се демонтирани.

Според американскиот претседател , има извештаи во кои OPCW тврдела дека во Сирија и натаму се употребува хемиско оружје. Официјален Дамаск, како и претходно изминатите години, тврди дека сунитските опозициски бунтовници кои ги поддржува Западот, како и исламските радикални групи, употребуваат боеви отрови кои ги заплениле при освојувањето на сириските воени магацини, но и дека добиваат боеви отрови од соседните арапски сунитски држави кои се противници на шиитскиот претседател Асад за да ја обвинат неговата влада.

Според руско-американскиот договор од октомври 2013 година, сириската влада се обврза да го предаде за уништување целото хемиско оружје, откако беше обвинета дека извршила напад врз предградие на главниот град Дамаск во кој загинале 1.400 луѓе, но таа тврди дека тоа го сториле бунтовниците за да испровоцираат западна интервенција според урнекот во Либија во 2011 година.

Покрај уништувањето на хемикалиите кои се сметаат за најопасни на бродот „Cape Ray“, остатокот од сириското хемиско оружје треба да биде уништено во капацитети во Велика Британија, Финска и САД.

Американскиот државен секретар Џон Кери најави во соопштение дека „САД ќе продолжат да даваат политичка и финансиска поддршка на умерената опозиција“ на претседателот Башар ал-Асад

Во вторникот Американската сојузна воздухопловна управа (FAA) им забрани на американските воздушни превозници да летаат над Сирија, со образложение дека вооружените судири и лошите безбедносни услови во таа земја претставуваат „сериозна потенцијална закана“ за цивилните авиони.

„Поради присуството на противавионско оружје меѓу екстремистички групи и борбите во повеќе области во Сирија, постои значителна потенцијална закана за цивилното воздухопловство во сирискиот воздушен простор“, соопшти FAA./крај/мф/сн

Извор: Макфакс