САД ги повикаа политичките лидери во Ирак на единство по повод најавата на Курдите дека ќе одржат референдум за независност.

Белата куќа соопшти доцна во четвртокот дека Ирак може да се спротистави на налетот на сунитските екстремисти единствено доколку остане обединет, пренесува AFP.

„Факт е дека продолжуваме да веруваме оти Ирак би бил посилен доколку е обединет“, рекол портпаролот на Белата куќа, Џош Ернест.

Тој истакнал дека „поради тоа САД продолжуваат да го поддржуваат Ирак кој е демократски, плуралистички и обединет“.

„Ќе продолжиме да настојуваме до сите страни во Ирак да продолжат да работат заедно кон оваа цел“, рекол претставникот за медиуми на Белата куќа.

САД се обидуваат да ги убедат ирачките сунити, шиити и Курди да формираат единствена влада во Багдад.

Претседателот на автономниот курдски регион во Ирак, Масуд Барзани, меѓутоа, во четвртокот од парламентот побарал да започне со организирање референдум за независност на тој регион, во моменти кога Ирак се соочува со офанзивата на џихадистите.

Парламентот би требало да „отпочне со подготовките за организирање референдум за правото на самоопределување“ на провинцијата која се стреми кон независност веќе десетина години, рекол Барзани во аудиоснимка од состанокот кој се одвивал зад затворени врати до кои успеала да стигне агенцијата AFP.

„Тоа ќе ја зајакне нашата положба и ќе биде моќно оружје во нашите раце“, додал курдскиот лидер.

Автономниот регион Курдистан веќе подолго време е во судир со ирачката федерална влада поради низа прашања, особено кога станува збор за она за што курдските политичари тврдат дека се одложени и недоволно буџетските надоместоци за регионот оваа година.

Ситуацијата, меѓутоа, дополнително се искомплицира кога курдските сили ја презеле контролата над градот Киркук, кој е исклучително богат со нафта, откако ирачките воени сили се повлекле од оваа област пред офанзивата на сунитските екстремисти која започна на деветти јуни.

Киркук се наоѓа во средишниот дел на територијата која курдските функционери сакаат да ја присоединат кон својот автономен регион кој се состои од три провинции, политика која наиде на остри критики од Багдад.

Според членот 140 од ирачкиот устав треба да се овозможи гласање за тоа дали спорните области ќе бидат припоени кон Курдистан, но овој член досега никогаш не бил применет поради политичките несогласувања.

Барзани, меѓутоа, во четвртокот истакна дека ова прашање е веќе решено и дека „не преостанува ништо друго туку дека жителите на овие области да донесат одлука за самоопределување“.

Курдските бунтовници во Ирак веќе со децении се борат со владата во Багдад и се подложени на репресија која најчесто е брутална, наведува AFP.

Курдите по соборувањето на сунитскиот ирачки диктатор Садам Хусеин имаат голема слобода во локалното управување во нивната автономна област и сега усвојуваат и свои закони, имаат свои безбедносни сили и управуваат со својот визен режим и политика поврзана со странските инвестиции, истакнува француската агенција.

По повикот на Барзани за отпочнување подготовки за референдум за независност, американскиот потпретседател Џозеф  Бајден, се сретна со шефот на кабинетот на Барзани, Фуад Хусеин во Белата куќа и и порачал на курдската делегација дека „важно е да се формира новата влада во Ирак која ќе ги обедини сите заедно“, и би се спротиставила на екстремистите од Исламска држава во Ирак и на Левантот (ISIL).

Бајден, како што наведува Белата куќа, исто така имал телефонски разговор и со турскиот премиер Реџеп Тајип Ердоган со настојување да добие поддршка од клучните држави во регионот за формирање на обединета ирачка влада./крај/мф/ап