САД првпат на Русија ѝ предале податоци за распоредувањето на сириските вооружени опозициски групи кои ги поддржува Вашингтон, и нивната анализа покажува дека разграничувањето на ткн умерена опозиција и исламистичките терористички организации уште не е спроведено, како што предвидува американско-рускиот договор од минатата седмица постигнат во Женева со цел да се создадат услови за заживување на политичкиот процес за завршување на пети и полгодишната војна во Сирија.

Ова во петокот на новинарите им ги соопшти специјалниот претставник на руското министерство за одбрана во целната група за надгледување на прекинот на огнот и хуманитарни прашања во Женева, полковникот Александр Зорин во текот на видеоконференцијата со Националниот центар на одбранбената управа во Русија, пренесува агенцијата РИА:

Според него, руската страна ги добила документите за време на средбата со претставниците на Пентагон и разузнавачките служби на САД во Женева.

„Ги проучуваме денеска предадените материјали, кои се однесуваат на регионите во коишто дејствуваат формациите кои се поддржувани од САД. Но прелиминарната анализа укажува дека тие не овозможуваат да се направи разграничување меѓу умерената опозиција и Џебхат ан-Нусра“, изјавил Зорин.

Истакнал дека при контактите со американската страна, Москва особено внимание посветува на „барањето за итно обезбедување информации, неопходни за разграничувањето на територии коишто се под контрола на терористите и опозицијата“.

Руското министерство за одбрана во одделно соопштение претходно објави дека сириската опозиција 39 пати го прекршила прекинот на огнот во последните 24 часа и дека САД не реагирале на доказите за кршење на примирјето. Министерството, исто така, тврди дека сириските владини сили го повлекла оружјето од автопатот Костело кај градот Алепо, додека опозициските групи кои ја имаат поддршката на САД тоа не го сториле.

Руското министерство за внатрешни работи, пак, објави дека шефот на дипломатијата Сергеј Лавров го повикал во петокот американскиот државен секретар Џон Кери да го исполни ветувањето и да ја одвои умерената сириска опозиција од Џебхат ан-Нусра, сириското крило на Ал Каеда коешто се преименуваше во Џебхат Фатех ал-Шам и наводно ги прекина односите со Ал Каеда, како и со другите терористички групации кои дејствуваат во Сирија.

Лавров во телефонскиот разговор со Кери, исто така, нагласил дека треба да биде објавен „целиот пакет“, кој се однесува на примирјето во Сирија, се додава во соопштението на руската дипломатија кое го пренесува агенцијата Reuters.

Иако Лавров и Кери оцениле дека примирјето во Сирија главно се почитува, Москва предупредила дека единствено Русија и владата на Сирија ги извршуваат своите обврски од спогодбата која ја договорија Москва и Вашингтон.

Дипломатски извори во петокот за светските агенции потврдија дека за ситуацијата во Сирија подоцна во петокот ќе се расправа на состанокот на Советот за безбедност при Обединетите нации.

Во понеделникот, на 12-ти септември, на сила стапи новиот пакет од американскиот-руски договор постигнат по 15-часовни преговори меѓу шефовите на дипломатиите Џон Кери и Сергеј Лавров во Женева. По првите 48 часа, примирјето беше продолжено за уште два дена, а потоа тоа треба да се одржи уште пет дена.

Договорот бара од двете завојувани страни да дозволат пристап на хуманитарната помош во опколените подрачја, во прв ред во најпогодените, како што е северниот град Алепо, втор по големина во земјата.

Доколку примирјето и хуманитарниот пристап се одржат цела седмица, САД и Русија ќе воспостават соработка против џихадистичките групации Исламска држава и Џебхат Фатех ал-Шам, порано позната како Џебхат ан-Нусра, сириското крило на Ал Каеда, кое го смени името поради соработката со некои бунтовнички групации кои ја имаат поддршката од САД и нивните регионални сојузници./крај/мф/сн

Извор: Макфакс