Додека САД разгледуваат давање дополнителна помош на сунитските сириски бунтовници кои ги смета за „умерени“ во борбата против Исламската држава, којашто може да вклучува и оружје и воздушни удари, коалициските сили под американско водство извршиле во петокот 27 воздушни удари во Ирак и Сирија.

Одлуката за новата помош на вооружената сириска опозиција ќе биде веројатно донесена во рамките на сеопфатната расправа за американската воена помош за бунтовниците во борбата против Исламската држава и е разгледувана заедно со Турција, пренесува Reuters, во време кога Русија започна со воздушни удари во Сирија против џихадистите, а Западот ја обвинува дека во тие напади страдаат и опозициските бунтовници, меѓу кои и малкуте преостанати кои ги обучуваа САД, што придонесува за нови вербални судири на релација меѓу Вашингтон и Москва.

Коалицијата предводена од САД извршила 27 воздушни напади на позициите на Исламската дражва во Ирак и во Сирија. Како што пренесува Reuters, 17 од нив се изведени во Ирак, од кои шест во близина на градот Рамади. Погодени биле позиции на џихадистите, единици, оружје и друг цели. Во Сирија биле погодени слични цели во десет воздушни удари недалеку од пет градови, но не е прецизирано каде.

Сириските опозициски групации тврдат дека најмалку 39 цивили од кои осум деца и осум жени се убиени во руски воздушни удар во изминатите четири дена. Руското министерство за одбрана ги отфрла тие обвинувања „без основа“ и тврди дека извршува напади далеку од цивилна инфраструктура. Според податоците објавени во саботата, во руските напади се убиени 14 исламистички борци и уништен е команден центар.

Кога станува збор за новата поддршка на Новите сириски сили (NSF), коишто ги вежбаат и опремуваат САД, на џихадистичката група Џебхат ан-Нусра, сириско крило на Ал Каеда, кон крајот на септември американската армија соопшти дека тие им предале шест возила и муниција кои им ги испорачала меѓународната коалицијата предводена од Вашингтон.

„Доколку овој извештај се покаже точен, многу е загрижувачки тоа што членовите на NSF ја снабдуваат Џебхат ан-Нусра и ги кршат насоките на сириската програма ‘Увежабај и опреми’’, изјави за медиумите портпаролот на Централната команда на американската армија за Блискиот исток (Centcom), пренесе Reuters

Новите сириски сили (NSF), сунитската вооружена опозиција која се бори против силите на претседателот Башар ал-Асад, која Западот ја оценува како „умерена“, ги предале камионите и муницијата во замена за безбедно минување низ подрачје под контрола на Џабхат ан-Нусра.

Ваква информација за предавање оружје, како и за минување на сириските опозициски борци во редовите на џихадистичките групи во Сирија имаше и во средината на септември. Сепак, американски функционер за AFP тврди дека „досега немало пребегнувања од NSF во ал-Нусра“, но се оградил велејќи „Ние го знаеме само она што ќе ни го кажат“.

Предавањето на оружјето претставува нов удар за веродостојноста на програмата којашто САД ја покренаа на почетокот од годинава. На почетокот од септрември американските медиум објавија дека САД ќе ја преиспитуваат стратегијата за справување со џихадистичките групи, што вклучува зголемување на групите обучени умерени сириски сунитски бунтовници кои ќе бидат вратени во Сирија и распоредување на оние локации каде што за нив е поголема поддршката од локалното населени.

Нагласувајќи ја неуспешноста на напорите предводени од САД за обуката на илјадници членови на сунтската вооружена опозиција којашто ја поддржува Западот, групацијата Џебхат ан-Нусра, која е сириско крило на Ал Каеда, во јули соопшти дека заробила повеќе од половината од 54-те обучени бунтовници за малку повеќе од една седмица откако тие беа распоредени во Сирија.

САД потврдија на почетокот од август дека го изведоа првиот воздушен напад во Сирија за да ја одбранат бунтовничка група Нова Сирија, која ја обучуваше американската војска, бидејќи ваквите сили кои Вашингтон ги смета за умерени, веднаш претрпеле загуби во судирите со исламистите. Овие американски воздушни напади врз позициите на екстремните исламисти се должеа на загубите што ги претрпеле сириските бунтовници обучувани и вооружени од САД кон крајот на јули. Веќе во првите операции оваа група изгубила десетина борци во судирот со борците на Џебхат ан-Нусра во северна Сирија.

Тогаш портпаролот на Белата куќа, Џош Ернест, изјави и дека не е исклучено САД да ги бомбардираат и силите на сирискиот претседател Башар ал-Асад, доколку бидат „принудени да ги заштити бунтовниците кои ги обучуваа“.

Како што претходно објавија САД, за речиси два месеца обучиле 60-ина борци на опозицијата, како што првично беше најавено, за борба против Исламската држава. Вкупно проверката според американските стандарди, вклучително и разузнавачките проверки, ги минале околу седум илјади доброволци. Вашингтон има намера да обучува пет илјади сириски опозициски борци годишно во базите во Турција, Катар, Јордан и Саудиска Арабија.

Во најавата на програмата на обуката, Вашингтон наведе дека му е цел да обучува по 5.000 борци годишно. Тие, како што стравува Дамаск, ќе бидат употребувани и во судирите со силите на сириската влада.

Американските воени власти задолжени за спроведување на оваа програма се соочуваат со тешкотии при селекцијата на кандидатите, бидејќи САД сакаат да ја ограничат опасноста меѓу нив да се инфилтрирани припадници на повеќе сунитски радикални исламистички организации коишто се активни на сириското боиште, кои потоа би се свртиле кон нив. Според најновите податоци коишто ги објави Пентагон, се пријавиле 3.750 сириски кандидати, од кои 400 ја минале подготвителната фаза.

Американскиот Конгрес, кој силно ја поттикнуваше администрацијата на претседателот Барак Обама на воена операција во Сирија и особено на споменатата програма, издвои 500 милиони долари за нејзиното финансирање.

САД најавија дека околу 1.000 американски војници ќе бидат распоредени за оваа програма на формирање сириски опозициски сили коишто ќе бидат способни да им се спротистават на добро вооружените и обучени екстремистички групи коишто ги потиснаа од многу покраини, особено од страна на Исламската држава. Засега 450 американски војници пристигнале на самото место, велат американски извори.

Некои од главните партнери на САД во регионот му забележуваат на Вашингтон што сака да ја води акцијата на сириската вооружена опозиција против џихадистите од Исламската држава, а ќе ја занемари борбата против силите на претседателот Асад.

Во февруари, Турција и САД потпишаа договор за обука на борците на сунитската опозициска Слободна сириска армија (FSA) за справување со Исламската држава. Притоа САД претпоставуваат дека во следните три години ќе обучат 15 илјади борци на FSA. Почетокот на програмата, кој беше планиран за 1-ви март, беше одложен поради барањето на Анкара за рамноправно учество на турските и на американските инструктори за обука на сириските бунтовници, како и за формирање заедничка комисија којашто ќе ги избира кандидатите./крај/мф/сн

Извор: Макфакс