Американскиот претседател Барак Обама изјави дека САД разгледуваат различни воени опции против припадниците на Исламската држава (IS) во Сирија, но истакна дека стратегијата допрва се разработува.
 

Американскиот претседател Барак Обама изјави дека САД разгледуваат различни воени опции против припадниците на Исламската држава (IS) во Сирија, но истакна дека стратегијата допрва се разработува.

Пред новинарите во Белата куќа американскиот претседател Барак Обама ги отфрли шпекулациите дека се наоѓа „на работ од носењето одлука“ за проширување на воздушните напади на нови цели на Исламската држава во Ирак, кои досега не беа цел на нападите на американските авиони, пренесува Reuters.

„Не сакаме да трчаме ’како прле пред магаре’. Сé уште немаме стратегија. Некои новински извештаи сугерираат дека сме отишле подалеку од позицијата на којашто во моментов сме“, рече Обама.

Американскиот претседател, исто така, најави дека државниот секретар Џон Кери ќе го испрати на Блискиот исток за да ја придобие поддршката од земјите во регионот против џихадистите од Исламската дражва.

Белата куќа којашто потврди дека ја разгледува можноста за воздушни удари врз припадниците на сунитската џихадистичка групација Исламска држава (IS) во области во Сирија коишто ги контролираат, исклучи во вторникот каква и да е можност за координација и соработка со владата на Сирија на претседателот Башар ал-Асад.

Претходно во понеделникот официјален Дамаск изрази подготвеност за соработка со меѓународната заедница, вклучително и со САД, во борбата против џихадистите, но истакна дека секој напад изведен на негова територија мора да биде во согласност и соработка со Дамаск, бидејќи во спротивност ќе се смета за агресија. САД во понеделникот навечер известија дека подготвуваат извидувања и подготовка на теренот за воени операции врз Исламската држава на територијата на Сирија, но предупредија дека уште нема одлука да се прошират двонеделните американски ограничени воздушни напади врз џихадистите од соседен Ирак. Портпаролот Ернест, истакна дека претседателот Барак Обама „сé уште не ја донел одлуката“ за воздушни напади на сириска територија.

САД од пред неколку дена ја разгледуваат можноста за воздушни напади во Сирија а од вторникот започнале со извидувачки летови над оваа земја поради евентуални напади врз џихадистите од Исламската држава чиишто позиции во Ирак веќе беа цел на американското воздухопловство, а чие брзо напредување и ширење предизвикува сé поголема загриженост од Западот.

САД и западот повеќе од три години ги поддржуваат сунитските опозициски вооружени востаници кои од март 2011 година по инерцијата на ткн Арапска пролет се обидуваат да го соборат алавитот (шиитот) Башар ал-Асад, кој ја има поддршката од алавитите, друзите, христијаните и умерените сунити, додека курдското малцинство во овој конфликт се држи резервирано и успеа да воспостави своја власт на териториите на кои доминира. Во почетокот опозициската Слободна сириска армија (FSA) која прима западна помош и од другите сунитски и арапски земји, против владините сили на Асад чие семејство четири децении управува со Сирија, се бореше заедно со групациите на радикалните исламисти како Фронтот ан-Нусра и Исламската држава, но дојде до конфронтации поради стремежите на радикалите да создадат калифат./крај/мф/сн

Извор: Макфакс