Руското користење на воздухопловна база во Иран за изведување на воздушни удари врз бунтовничките исламистички групи во Сирија е „несреќно но не изненадувачко“, соопштија во вторникот од американскиот Стејт департмент, додавајќи дека Вашингтон уште ги анализира димензиите на руско-иранската соработка и легалноста на руското користење на иранскиот воздушен простор.

Руските бомбардери распоредени во Иран во вторникот ги гаѓале позициите на бунтовниците во Сирија, соопшти руското министерство за одбрана, откако Русија ги размести своите борбени авиони во иранска воздухопловна база поради проширување на својот ангажман во Сирија. Министерството за одбрана објави дека нападите се покрената од воздухопловната база кај Хамадан, а се изведуваат со стратешките бомбардери „Туполев-22М3“ придружувани од ловите бомбардери „Сухој-34“.

Руските медиуми објавија дека бомбардерите „Туполев-22М3“, кои веќе изведоа бројни напади врз милитантите во Сирија од базите на југот од Русија, се преголеми за да се сместат во руската воздухопловна база во Сирија. Иранската база покрај Хамадан се наоѓа на северозападот од Иран и руските бомбардери мораат да го прелетуваат Ирак за да вршат бомбардирања во Сирија.

Портпаролот на американскиот Стејт департмент, Марк Тонер, изјави дека руското користење на иранските бази нема нужно да ги спречи САД да постигнат договор со Москва за соработка во борбата против Исламската држава во Сирија, откако претходно во вторникот рускиот министер за одбрана Сергеј Шојгу објави дека двете земји се блиску до постигнување договор за заедничко дејствување во северната сириска покраина Алепо иако поддржуваат различни страни во сирискиот конфликт.

„Меѓутоа, сé уште не сме дошле до тоа“, рекол Тонер, додавајќи дека Русија наводно продолжува со нападите врз сунитската вооружена опозиција во Сирија, којашто САД ја нарекуваат „умерена“, пренесува Reuters.

Тонер додал дека САД го проучуваат прашањето дали руското користење на иранскиот воздушен простор за напади врз екстремистите во Сирија претставува кршење на Резолуцијата 2231 на Советот за безбедност на ОН.

„Најкусиот одговор на вашето прашање е – ние го проучуваме тоа“, изјави портпаролот на американската дипломатија на редовниот брифинг со новинарите, запрашан дали Вашингтон смета дека користењето на руските бомбардери на базата во Иран е кршење на резолуцијата 2231 на Советот за безбедност, пренесува агенцијата ТАСС.

Според Тонер, „многу е веројатно да има кршење на Резолуцијата 2231, која забранува доставување, продажба или предавање на борбени воени апарати на Иран, без одобрение на Советот за безбедност на ОН“, „Знам дека нашите правници се обидуваат во оваа фаза да соберат што е можно повеќе детали“, рекол портпаролот на Стејт департментот.

Тонер не можел да каже какви би можеле да бидат реалните последици доколку се смета дека Москва ги повредила одредбите од Резолуцијата 2231 на Советот за безбедност на ОН, но смета дека една од можните солуции би била „разговори за сложената ситуација на ниво на Советот за безбедност“.

Тонер известил и дека американскиот државен секретар Џон Кери во телефонскиот разговор со својот руски колега Сергеј Лавров му ја изразил загриженоста од руското користење на база во Иран за гаѓање цели во Сирија, но не дал детали, забележува агенцијата РИА.

Друг американскиот функционер за Reuters рекол дека Русија ја предупредила меѓународната коалиција предводена од САД за борба против Исламската држава дека ќе полетува од Иран.

„Русија ја предупреди коалицијата“, рекол за Reuters портпаролот на коалицијата Крис Гарвер на прес-конференцијата пренесувана со видео линк.

„Тие нé известија дека ќе прелетаат преку зоната под контрола на коалицијата…, но тоа немаше никакво влијание врз операциите кои во исто време и изведуваше коалицијата, ниту во Ирак, ниту во Сирија“, истакнал портпаролот.

Се смета дека ова е првпат Русија да изведува удари врз цели во Сирија од иранската територија, откако во септември минатата година одговори на барањето на својот блискоисточен сојузник сирискиот претседател Башар ал-Асад./крај/мф/сн

Извор: Макфакс