Американскиот министер за одбрана Ештон Картер во четвртокот вечерта во Брисел изјави дека ака коалицијата против џихадистичката група Исламска држава (IS) со зголемување на воените придонеси на партнерите брзо да оствари чувствителен напредок.

„Овој министерски состанок одбележува почеток на нова етапа во кампањата на коалицијата за победа над Исламската држава“, изјави американскиот министер за одбрана Ештон Картер во Брисел пред колегите од 49 земји, меѓу кои и од Саудиска Арабија и од Ирак.

САД бараат од партнерите со оружје, опрема, единици и финансиски, да учествуваат во забрзувањето на кампањата против споменатата џихадистичка организација со која се сака да се освојат градовите Мосул, вториот по големина во Ирак, и сириското упориште Рака, појасни Картер.

По овој состанок на министрите за одбрана на меѓународната коалиција предводена од САД, прв во овој формат од започнување на воздушната кампања во Сирија и во Ирак пред повеќе од 18 месеци, шефовите на штабот на коалицијата ќе се сретнат за неколку седмици пред конференцијата на американската централна команда, потсети Картер.

„Најдоцна до тогаш мораме да започнеме да забележуваме опиплив напредок остварен благодарејќи на тие дополнителни капацитети“, изјави Картер и потсети дека „Исламската држава не се заканува само на животите на Ирачаните и на Сиријците, туку и на безбедноста на граѓаните на сите наши земји“.

Портпаролот на саудиското министерство за одбрана, заменикот на принцот престолонаследник Мохамед бен Салман потврди дека е „неотповиклива одлуката на оваа сунитска монархија која го практикува вехабитскиот ислам, да распореди копнени сили на територијата на соседна Сирија. Кралството е подготвено да води воздушни и копнени операции во рамките на коалицијата и под команда на САД, појасни портпаролот.

Сириската влада на шиитскиот претседател Башар ал-Асад соопшти дека таквата одлука за влегување на сириски копнени војски во Сирија ќе го смета за агресија и оти ќе одговори на неа со сите расположливи средства. Неговите сојузници Русија и Иран, исто така, предупредија на погубноста од таквата можност, која според нив само ќе го разгори судирот во целиот регион. Саудиска Арабија, имено, слична операција води и во Јемен и против побунетото шиитско племе Хути и против сунитските противници на владата којашто ја поддржува Ријад.

Кога станува збор за евентуалното придружување на НАТО на коалицијата, Картер во Брисел беше многу неодреден.

Во 18-те месеци коалицијата извела повеќе од 10.000 воздушни напади. Пентагон смета дека Исламската држава изгубила околу 40 отсто од територијата која ја контролирала в Ирак, и околу 10 отсто која ја контролирала во Сирија. Но заземањето на градовите Мосул и Рака, коалицијата го планира за неколку месеци, но мора да брза, особено во Сирија, каде што владините сили се во голем налет во офанзивата помогната од руските воздушни удари.

Канада тројно ќе го зголеми бројот на припадниците на своите специјални сили кои ги обучуваат курдските милиции во северен Ирак и ќе ги има 210. Словенија вети дека ќе испрати воени инструктори, а парламентот на Холандија во средата одобри да се прошират нападите на холандските ловци-бомбардери во Сирија. Белгија во јули на една година ќе ги испрати своите „F-16“ во Ирак а треба да го консултира својот парламент пред дејствувањето во Сирија, изјави министерот Стивен Вандепут.

НАТО во четвртокот начелно се согласи за распоредувањето на своите авиони „Awacs“ над САД за да ѝ овозможи на американската армија да ги ослободи своите дополнителни авиони за операции над Сирија и Ирак. НАТО, кој досега одбиваше директно да учествува во коалицијата против Исламската држава, ја разгледува можноста да се придружи како полноправен член, изјави Картер на крајот од состанокот во Брисел. Неговата улога би била ограничена на задачи на стабилизација по удирите, советување на институциите и обука на единиците, додаде американскиот министер за одбрана./крај/мф/сн

Извор: AFP