Во последните секунди од снимката на „црната кутија“ на рускиот патнички авион „Airbus A321“ со 224 патници и членови на екипажот, кој на 31-ви октомври полета од египетското летувалиште Шарм-ел-шејк за Санкт Петербург и по половина час лет се урна на Синајскиот полуостров, забележани се невообичаени звуци, изјави во саботата вечерта, челникот на меѓународната комисија за испитување на причините за трагедијата, Ајман ал-Мукадам.

„Снимачот на летот од кокпитот регистрирал шум во последната секунда од податоците за летот на авионот. Сепак, уште не ја знаеме причината за тој звук“, изјавил ал-Мукадам додавајќи дека египетските власти ги вложуваат сите напори и апелираше да бидат споделувани сите информации кои можат да ја расветлат несреќата.На прес-конференцијата Ајман ал-Мукадам повторил дека двете „црни кутии“ биле најдени уште првиот ден по несреќата, а дека остатоците од авионот биле раштркани на повеќе од 12 километри, но и оти не се пронајдени сите. „Сите пронајдени делови од авионот ќе бидат доставени во Каиро, на безбедно место за натамошно испитување“, додал ал-Мукадам, пренесува агенцијата ТАСС.„Првичното декодирање на параметарската ‘црна кутија’ укажува дека полетувањето било изведено во 03:50:06 според UTC (4.50.06 часот по македонско време. Записот на снимачот запрел во 04:13:20 (05:50.20 – македонско време). Оттаму, времетраењето на снимката, од моментот на полетувањето до прекинот на снимањето изнесува 23 минути и 14 секунди. Последниот запис е регистриран на височина од околу 30.888 стапки (околу 9.414 метри), додека авионот бил во фазата на искачување“, рекол ал-Мукадам.Според него, последната забележана брзина на авионот е 281 јазли (околу 521 километар на час) „Автопилотот бил вклучен до крајот на снимката на параметарскиот рекордер“, додал ал-Мукадам.Кога станува збор за „црната кутија“ која ги снима звуците и разговорите во пилотската кабина, челникот на меѓународната истрага истакнал дека е „безбедно извлечена и првото нејзино дешифрирање е веќе направено“. „Сепак, тимот кој ја проучува сé уште е во фаза на дешифрирање, за што ќе биде потребно одредено време“, додал ал-Мукадам. „Во моментов е утврдено дека во последните секунди од снимката се слуша шум. Природата на овој звук ќе биде утврдена во специјална лабораторија, каде што ќе биде извршена спектрална анализа“, додал водачот на истрагата. Претходно извори од рускиот и од египетскиот тим кои работат во рамките на меѓународната комисија изјавија дека „нема потврда дека имало експлозија во авионот“, одговарајќи на прилогот на француската телевизија France2 од петокот вечерта, во кој повикувајќи се на европски извори од комисијата беше истакнато дека на снимката од „црната кутија“ се слушнал шум кој посочува на експлозија, и тоа која не личи на експлозија на мотор.Како што истакнал на прес-конференцијата ал-Мукадам, остатоците од рускиот патнички авион откриените на местото на падот на Синајскиот полуостров не овозможуваат да се утврди природата на дејствието и точните причини за несреќата.„Авионот се распаднал во воздух, а сепак точно да се кажат причините за тоа не е возможно. Остатоците од авионот не ни дадоа јасна слика за она што се случило“, изјавил шефот на истрагата, и истакнал дека „До крајниот заклучок сé уште не дојдовме“Директорот на руската Федерална службана за безбедност (ФСБ), Александр Бортников, во петокот изјави дека смета оти е неопходно да се сопрат сите летови за Египет, особено туристичките, сé додека не се утврдат вистинските причини за трагедијата. Од петокот вечерта, претседателот Владимир Путин, според препораките на ФСБ донесе указа за суспендирање на летовите кон Египет./крај/мф/сн

Извор: Макфакс