– Експлозија на автомобил бомба во близина на саудиската престолнина Ријад, во која загина едно лице а две беа ранети, 16-ти јули 2015

Саудиска Арабија уапсила 431 лице осомничено за припадност на џихадистичката сунитска организација Исламска држава (IS), објави во саботата министерството за внатрешни работи на кралството и притоа прецизираше дека во акциите за приведувања речиси 40 луѓе загинале и уште 120 биле ранети.

Саудиска Арабија уапсила 431 лице осомничено за припадност на џихадистичката сунитска организација Исламска држава (IS), објави во саботата министерството за внатрешни работи на кралството и притоа прецизираше дека во акциите за приведувања речиси 40 луѓе загинале и уште 120 биле ранети.

„Уапсено е 431 лице осомничено за поврзаност со Исламската држава. Во текот на приведувањата загинаа 37 луѓе, меѓу нив припадници на безбедносните сили и цивили, а 120 се ранети“, се вели во соопштението на саудиското министерство за внатрешни работи. Се додава и дека во овие безбедносни операции биле ликвидирани уште шест осомничени терористи.

Меѓу уапсените имало лица кои учествувале во организирањето на терористичките напади во мај годинава во источните области на Саудиска Арабија, каде живеат припадниците на шиитската заедници, во кои беа убиени повеќе од дваесет Саудијци.

Најголем број од приведените се поданици на кралството, но има и државјани на Јемен, Египет, Јордан, Алжир, Нигерија и Чад, се додава во соопштението. Но не е наведено во кој период биле изведени споменатите операции на саудиските безбедносни сили.

Според министерството, била запленета голема документација, уреди за радиокомуникација, експлозивни материи, големо количество разно оружје и муниција за него. Се истакнува дека со акциите биле спречени неколку поголеми терористички напади, чии цели биле странски дипломатски мисии во главниот град Ријад, како и џамии во многу делови од земјата, особено во источните, и тоа секој петок по традиционалната петочна молитва.

„Терористичките заговори чии цели биле дипломатски мисии, безбедносните сили и владини згради во покраината Шарурах и атентати врз припадници на безбедносните сили, се спречени“, се истакнува во соопштението.

Оваа објава следеше откако автомобил бомба експлодираше на контролен пункт во близина на ден од најстрого чуваните затвори во четвртокот, во кој загина едно лице а уште две беа ранети, во нападот за кој одговорноста ја презема Исламската држава.

Низата смртоносни напади коишто ги изведоа приврзаниците на ултрадикалните исламистички групи од Ирак и од Сирија ја зголеми загриженоста за зголемената закана за најголемиот светски извозник на нафта. Исламската држава ги повика своите следбеници да организираат напади во кралството Саудиска Арабија и во два самоубиствени напада врз шиитски џамии во мај беа убиени 25 луѓе. Во јуни, пак, во соседен Кувајт, Саудиец се разнесе во шиитска џамија во време на петочната молитва при што загинаа 27 верници. Сунитските џихадисти ги сметаат шиитите за „неверници“ и ги прогонуваат ви земјите од Блискиот исток. Саудиските власти го идентификуваа напаѓачот како Фахд ал-Каба кој од Ријад преку Бахреин допатувал во Кувајт само неколку часа пред да го изврши атентатот.

Во февруари 2014 година, саудиските власти кои беа критикувани дека се толерантни кон екстремните сунитски исламистички групи, ја заострија политиката преку носењето на законот за борба против тероризмот. Во следните речиси 18 месеци, министерството за внатрешни работи повеќепати објавуваше за масовни апсења поради екстремизам. Така ланскиот декември беше објавено дека се приведени 135 луѓе, од кои 26 странци. Кон крајот на април годинава, пак, беше соопштено дека се уапсени уште 93 терористи, кои биле припадници на неколку ќелии на Исламската држава. Меѓутоа, останува непознато дали овие податоци се содржани во соопштението објавено во саботата./крај/мф/сн

Извор: Reuters