Стануваат сé поостри меѓусебните напади меѓу поранешната државна секретарка Хилари Клинтон и сенаторот од Вермонт, Берни Сандерс, кандидатите за номинација на Демократската партија за ноемвриските претседателски избори во САД, пред предизборите во државата Њујорк, откако вториот ја поврза поранешната прва дама со аферата Panama Papers која открива како светските челници и славни личности користеле офшор компании во ткн даночни оази за да го прикријат текот на парите и да го избегнат плаќањето даноци. 

Сенаторот Берни Сандерс, оценуваат американските медиуми, досега беше пристоен кон Хилари Клинтон и покрај нејзините зајадливи и навредливи забелешки. Меѓутоа од средата го промени тонот на собирот во Филаделфија, тврдејќи дека неговата противкандидатка, која му забележува дека е неквалификуван за водење на надворешната политика на САД, е неквалификувана да биде претседателка.

„Неодамна изјави дека не сум, отворете наводници, квалификуван да бидам претседател. Дозволете ми, мора да ѝ одговорам на Клинтон, дека не мислам дека таа е квалификувана, доколку сп својот супер PAC (одбор за собирање пари за нејзината кампања – з.р.) зема десетици милиони долари од поедини интересни групи или лобија“, изјави Сандерс.

„Не мислам дека сте квалификувана доколку примате 15 милион од Волстрит преку вашиот супер PAC. Не мислам дека сте квалификувана доколку сте гласале за катастрофалната војна во Ирак (…) Не мислам дека сте квалификувана доколку сте го подржале договорот за слободна трговија со Панама“, порача Сандерс.

Сенаторот тврдеше дека тој договор, за кој според неговото мислење се заземала особено поранешната државна секретарка, „на богатите поединци и компании во светот им го олеснува затајувањето на даноците кои би морале да ги плаќаат на својата земја“, како што покажуваат милионите документи од аферата Panama Papers.

Клинтон, којашто во вторникот вечерта ги загуби предизборите во сојузната држава Висконсин, и сака да постигне убедлива победа во Њујорк на 19-ти април, избегна поради јавното мнение да го обвини директно Сандерс дека не е квалификуван.

Во средата таа изјави дека „не ја разработил својата политика“ во врска со една од главните теми на неговата кампања – разбивањето на преголемите банки, по интервјуто на Берни Сандерс за дневниот весник Daily News. Во него не бил јасен туку само рекол дека големите банки мораат самите да одлучат како ќе се реструктуираат, смета Клинтон.

Битката меѓу двајцата демократи кои на 14-ти април во Бруклин ќе учествуваат во дебата, подразбира користење на сите средства, интервјуа, собири и социјални мрежи,

Клинтон и натаму уверливо води во трката за демократската номинација, но неодамнешната победа на Сандерс во повеќе сојузни држави ја заживеа кампањата на 74-годишниот сенатор.

Сандерс се надева на победа во Њујорк, на најважните предизбори кога станува збор за обезбедувањето на делегатите, пред предизборите во Калифорнија кои ќе се одржат во јуни. Клинтон, пак, чија изборна база е токму Њујорк, сака надмоќна победа за конечно да го остави Сандерс далеку зад себе во трката за партиската номинација. Според неодамнешната анкета на универзитетот Квинипекc, Клинтон во споменатата сојузна држава има поддршка од 52 отсто од партиските гласачи, додека Сандерс – 42 отсто./крај/мф/сн

Извор: AFP