Јужна Кореја предупреди во понеделникот дека нема да ја прекине својата пропагандна војна на границите сé додека Северот не се извини за гранатирањето, во моментите кога двете земји водат маратонски преговори за намалување на воената напнатост на Корејскиот полуостров, но и двете страни го засилуваат военото присуство на границата.

Јужнокорејската претседателка Парк Гуен-хи предупреди во понеделникот додека високите претставници на двете земји повторно започнаа повеќечасовни преговори зад затворени врати во демилитаризираната зона во пограничното место Панмунџом, во кое во 1953 година е потпишан договорот за прекин на огнот по војната која започна во 1950 година.

„Северна Кореја мора да изнесе јасно извинување за провокацијата и да гарантира дека нема да има нови провокации“, изјави претседателката Парк и обвини дека Пјонгјанг ја предизвикал сегашната криза со „провокативните активности“.

Средбата на високите воени и владини претставници во демилитаризираната зона во споменатиот своевиден парк поделен со воено-демилитаризациската линија почна набрзо по истекот на рокот кој го даде Северна Кореја на Јужна за прекинување на емитувањето на пропаганда долж границата со закана за воена акцијата. Рокот истече без инциденти поради започнувањето на преговорите. Меѓутоа, според јужнокорејската телевизија YTN, во моментов уште од 11 пунктови на границата се активни пропагандните звучни инсталации.

Преговорите во Панмунџом ги водат јужнокорејскиот советник за национална безбедност Ким Кван-Џин и неговиот севернокорејски колега Хванг Пјонг-Со, кој се смета за близок соработник на младиот челник Ким Јонг Ун. По првиот круг од преговорите кои траеше без прекин десет часа, двете страни ги продолжија преговорите во неделата попладне кои сé уште траат и во понеделникот.

Односите меѓу Југот и Северот на Корејскиот полуостров ескалираа откако на четвртокот и двете земји разменија артилериски оган во западниот дел од Демилитаризираната зона. Според Сеул, први оган отвориле севернокорејските војски, а нивна цел биле звучните инсталации од кои Јужна Кореја неодамна по десет години пауза започна да емитува пропаганда против власта во Пјонгјанг. Причина за тоа беше експлозијата на нагазни мини во бафер зоната кога тешко настрадаа двајца јужнокорејски војници, за што Сеул го обвинува Пјонгјанг, кој тврди дека со тоа нема поврзаност.

Јужна Кореја истрела околу 30 проектили на севернокорејска територија, по што Пјонгјанг даде 48-часовен ултиматум Сеул да престане со пропагандата, или ќе следува воздушен напад. Во моментов активни се 11 такви звучници, но сепак од саботата започнаа преговори на највисоко ниво во последната деценија за надминување на кризата.

Претходно во неделата утрото, јужнокорејски воени извори соопштија дека и покрај започнатите меѓукорејски разговори за намалување на тензиите по неодамнешната размена на оган, Северна Кореја двојно го зголемила бројот на артилериските единици на границата, како и дека речиси 70 отсто од нејзините подморници, неколку десетици, ги напуштиле своите бази и испловиле на отворено море. Шест јужнокорејски борбени авиони од типот „F-16D“, исто така во неделата, предвреме ја завршија заедничката воена вежба со армијата на САД „Red Flag Alaska“ која започна на 10-ти август на Алјаска поради неопходноста од зајакнување на воздушната одбрана во врска кризата.

Во понеделникот јужнокорејската новинска агенција Yonhap повикувајќи се на разузнавачки извори во Сеул објави дека Северна Кореја во Жолтото Море испратила 20 брзи борбени амфибии наменети за превоз на специјални сили за десант врз непријателска територија.

Од своја страна Јужна Кореја и САД во понеделникот разговарале за дополнително разместување на југот од Корејскиот полуостров бомбардери од типот „B-52“ и американска нуклеарна подморница стационирана во Јапонија./крај/мф/сн

Извор: Макфакс