Високо позиционирани функционери на Северна и на Јужна Кореја започнаа преговори во саботата за намалувањето на тензиите во регионот, пренесува телевизијата YTN повикувајќи се на висок владин претставник во Сеул.

Во преговорите од јужнокорејска страна учествува советникот на претседателот за безбедност Ким Гван Чжин, и министерот за национално обединување Хонг Јонг Руо, додека Северна Кореја ја претставуваат челникот на Главното политбиро на Корејската народна армија, Хван Бјунг Со и шефот на одделот за прашања од обединувањето на Централниот комитет на владејачката Работничка партија на Кореја, Ким Јанг Гон.

Преговорите се вода без присуство на јавноста, во Демилитаризираната зона, во местото Пханмунџоом, своевиден пар поделен со воено-демаркациската линија, но каде за разлика до другите делови од границата меѓу двете Кореии, нема бодликава жица и огради. Во овој пункт има објекти опремени за постојан контакт меѓу двете страни, а линијата на разграничувањето е на само неколку метри од една од друга, на чии страни постојано стојат војници на Корејската народна армија (Северна Кореја) и на Вооружените сили на Република (Јужна) Кореја во став мирно со стиснати тупаници.

Меѓутоа, и покрај почетокот на преговорите, воените трупи и од двете страни се ставени во состојба на зголемена борбена подготвеност. Околу 6.500 луѓе од петте јужнокорејски окрузи во близина на Демилитаризираната зона се евакуирани во засолништа од воздушен напад.

Согласноста за започнување дијалогот Север – Југ беше постигната само неколку часа пред истекот на ултиматумот кој го постави севернокорејската страна со барање да бидат прекинати емитувањата на пропагандните пораки против властите од Пјонгјанг, од звучниците кои ги постави Сеул. Северна Кореја се закани дека со артилерија ќе ги уништи инсталациите, доколку е не биде исполнет нејзиниот услов. Како доказ за сериозноста на нејзините закани, во четвртокот од различни видови оружја беа гаѓани неколку пропагандни звучници.

Во 2004 година двете Кореи се договорија дека ќе ги демонтираат звучниците за пропаганда од двете страни на границата. Емитувањето на пропаганда и контрапропаганда беше составен дел на психолошката војна меѓу двете земји, по завршувањето на вооружениот во 1953.

Јужна Кореја неодамна по повеќе од десет години повторно ги постави звучниците за пропаганда на границата, по експлозии на противпешадиски нагазни мини во пограничната област за што го обвинува Пјонгјанг, и во кои на 4-ти август тешко беа повредени двајца јужнокорејски војници кои останаа инвалиди. Сеул од тие звучници емитува пораки во кои ја осудува оваа наводна севернокорејска провокација.

Пјонгјанг минатиот петок негираше дека има некаква врска со тие експлозии, и побара Сеул да ја прекине својата пропагандна војна а штотуку започнатата заедничка американско-јужнокорејска воена вежба ја нарече „објавување војна“, и се закани дека ќе изведе воздушни удари.

Ситуацијата на Корејскиот полуостров ескалираше во четвртокот, кога Јужна Кореја соопшти дека артилериски била гранатирана нејзината територија од страна на Северна Кореја. Неколку часа подоцна силите на јужнокорејската армија отворија „возвратен оган кон изворот на огнот од страна на непријателот“, и притоа беше известено за триесетина артилериски истрели. Пјонгјанг реагираше со соопштение дека Југот стрела без причини, по што во петокот продолжија меѓусебните обвинувања за провокации и закани со одмазда.

„Дојдовме до работ на војната и ситуацијата е непоправлива“, објави во својата порака севернокорејското министерство за надворешни работи објавено претходно во саботата.

Американските коментаторите, сметаат дека треба да се релативизираа тие „воени повици, вообичаени за Пјонгјанг“, а доколку постои опасност од ескалација, некои од нив во тоа гледаат само уште една провокација во низата на севернокорејскиот режим.

„Имајќи ги предвид нивните методи на преговори во минатото, веројатноста дека ќе ја спроведат својата закана е многу мала“, истакнува Џејмс Ким, истражувач од Институтот за политички студии Асан од Сеул. Но, истовремено, признава дека не е лесно да се погодат намерите на младиот севернокорејски лидер Ким Јонг Ун, како и дека можноста од напад не може сосема да се исклучи.

„Подготвени сме одлучно да одговориме на секоја севернокорејска провокација“, изјави портпаролката на јужнокорејската претседателка, додека агенцијата Yonhap во саботата утрото објави дека е регистрирано раздвижување на артилериските единици на Северот поради можен напад врз звучниците.

Сеул соопшти дека нема намера да ги исклучи овие пропагандни инсталации. Севернокорејската државна новинска агенција KCNА, пак, објави дека Ким поради тоа објавил „полувоена“ состојба и му се закани на Сеул, дека доколку не ја прекине пропагандната војна „ќе му биде одговорено со вистинска“./крај/мф/сн

Извор: Макфакс