Милиони муслимански шиитски аџии во саботата во Кербала го одбележуваа еден од најважните денови во нивниот верски календар, денот на загинувањето на имамот Хусеин, внукот на пророкот Мухамед, за да се спречат вообичаените напади од сунитските екстремисти во светиот град се распоредени силни полициски единици.
 

Милиони муслимански шиитски аџии во саботата во Кербала го одбележуваа еден од најважните денови во нивниот верски календар, денот на загинувањето на имамот Хусеин, внукот на пророкот Мухамед, за да се спречат вообичаените напади од сунитските екстремисти во светиот град се распоредени силни полициски единици.

И покрај заканите од напади на сунитските џихадисти од Исламската држава и нивните екстремни сојузници, некои од аџиите до Кербала патуваа 12 дена од оддалечените делови на Ирак или од соседен Иран. Многу од нив патуваа во пренатрупани автобуси или камиони.

Ирачкиот министер за одбрана Калед ал-Обеиди во четвртокот изјави дека оваа година во Кербала, којашто се наоѓа околу 110 километри јужно од ирачката престолнина Багдад пристигнале рекорден број аџии – 17,5 милиони, од коишто четири милиони дошле од 60 странски земји.

Улиците на светиот град се преплавени од реките верници облечени во црно кои сакат да стигнат до мавзолејот на имамот Хусеин. Неговото убивање коишто го извеле приврзаниците на калифот Јазид во 680 година во Кербала дефинитивно значело раскол меѓу шиитите и сунитите.

Агенциите известуваат дека шиитските верници ги истакнуваат, црните, црвените или зелените знамиња со сликите на имамот или со верски натписи, се удираат во градите и пеат во колективен транс. Меѓутоа, годинешниот аџилак повеќе од досегашните има политичка димензија, имајќи го предвид фактот дека поголеми делови од ирачката територија се под контрола од сунитските џихадисти, припадниците на терористичката групација Исламска држава кои шиитите ги сметаат за еретици.

Поради тоа, ирачките власти преземаа силни безбедносни мерки и распоредија голем број припадници на безбедносните сили за да се избегнат потенцијални напади од џихадистите. По нападот од петокот со граната кога во близина на Кербала смртно настрада едно лице, бројот полицајци од 15 е зголемен на 40 илјади, изјавил функционер на безбедносните операции во Кербала, генералот Каис Калаф Рахим.

Меѓутоа, аџиите не стравуваат. „Заборавете ги гранатите. Доколку џихадистите и нападнат на Керала тоа нема да не’ спречи да стигнеме до мавзолејот на имамот Хусеин“, изјавил за АFP 25-годишниот Каден Хусеин, кој од Насирија, оддалечена околу 300 километри, до светиот град стигнал пешки.

„Желбите и настојувањата на џихадистите се попусти, бидејќи ние тука стигнавме подготвени на жртва, надевајќи се дека ќе станеме маченици“, појаснува Абдел Хусеин Салем, доброволец кој на аџиите на влезот во градот им дели храна.

Челниците на ирачката влада, во којашто доминираат мнозинските шиити и верските власти, во годинешниот аџилак го препознаваат отпорот на шиитските верници кон радикалната сунитска групација Исламска држава. Многубројни Иранци велат дека на аџилакот пристигнале по наредби врховниот верски водача на Исламската Република, ајатолахот Али Хамнеи./крај/мф/сн

Извор: Макфакс