Најмалку две лица се убиени во експлозија на автомобил бомба во сириската покраина Хама, а три бунтовнички борци се убиени во покраината Латакија во саботата утрото, првиот ден откако на сила е прекинот на огнот, кој започна во петокот вечерта во 23 часот, а групата за надзор на прекинот на огнот ќе проценува како се почитува тоа, најави специјалниот известувач на ОН за Сирија, Стефан Де Мистура и предложи мировните преговори да се одржат на 7-ми март.

Експлозијата на автомобилот бомба во покраината Хама се случила само неколку часа откако на сила стапи договорот за запирање на непријателствата, во рамките на руско-американскиот план, соопшти сириската државна телевизија,

Сириска бунтовничка група во северозападниот дел од земјата објави дека била цел на напад на владините сили во саботата утрото и ги обвини за кршење на примирјето. Тројца припадници на бунтовничката Прва крајбрежна дивизија убиени се отфрлајќи напад во областа недалеку од турската граница во покраината Латакија, изјавил портпаролот на групата Фади Ахмад за Reuters. Првата крајбрежна дивизија е дел од сојузот на бунтовничките сили позната како Слободна сириска армија (FAS или SLA).

„Тоа претставува кршење на договорот“, изјавил Ахмад, Според него тоа бил копнен напад без воздушна поддршка на владините сили. „Во моментов владините сили го прекинаа нападот“, додал.

Агенциите јавуваат дека мирот завладеал на подрачјата на главниот град Дамаск и на Алепо, најголемиот град и поранешна финансиска престолнина на Сирија кој 40 отсто е во рацете на бунтовниците. Опозициската Сириска опсерваторија за човекови права (SOHR) со седиште во Лондон наведува дека рускаа авијација, којашто ги помага силите на владата на претседателот Башар ал-Асад, од полноќ не извела ниеден напад. Мирот завладеал и во покраините Хама и Хомс, го цитира AFP соопштението на организацијата.

Специјалниот известувач на ОН за Сирија, Стефан де Мистура, најави ноќта кон саботата дека следните мировни преговори за Сирија би требало да започнат на 7-ми март во Женева, пренесе Reuters. На конференцијата одржана во Женева откако со видео врска на Советот за безбедност на ОН во Њујорк му ги најави мировните преговори за март, Мистура изјави дека прекинот на огнот го надгледуваат центри во САД, Русија и во Женева.

Првиот состанок на групата на надзор на прекинот на огнот во Сирија беше одржан во петокот во Женева, само неколку часа пред да стапи на сила договорот за прекинот на непријателствата на кој се обврзаа сириската влада и стотиците бунтовнички групи.

Со прекинот на огнот не се опфатени, ниту со него се согласија, екстремните сунитски групации Исламска држава и Џебхат ан-Нусра, сириското крило на Ал Каеда. Водачот на ан-Нусра најави нови напади.

Преговорите меѓу владата во Дамаск и опозициските сунитски вооружени групи беа откажани на почетокот на февруари поради тоа што бунтовниците одбиваа да преговараат по големите загуби на територии во силната офанзива на владините сили со поддршка на руските воздушни удари.

Советот за безбедност на ОН во петокот едногласно ги повика сите страни вклучени во петгодишниот граѓански конфликт во Сирија да ги почитуваат условите од американско-рускиот договор за прекин на огнот. Тоа барање е ставено во резолуција која заеднички ја изработија Русија и САД и со која се повикуваат владата и опозицијата на мировни преговори под покровителство на ОН./крај/мф/сн

Извор: Макфакс