Џихадистите од терористичката организација Исламска држава (IS) ограбиле и опустошиле околу 750 објекти од културното наследство на целата територија на Сирија од почетокот на нивното појавување на сириското боиште, изјавил во средата заменикот министер за култура Џамал ал-Кајим. 

„Околу 750 историски локалитети претрпеле оштетувања. Точни податоци нема, а можно и оваа бројка да биде и поголема. Тие имаат јасна цел да уништат сé што нé поврзува со древните цивилизации, и целосно да ја уништат нашата историја. Тадмур (арапскиот назив за Палмира –з.м.) не е исклучок, под закана од целосно уништување се храмови изградени уште во времето на Римската империја“, изјави ал-Кајим за агенцијата РИА. Додаде и дека стотици скулптури претходно биле засолнати за да бидат заштитени од уништување, но се стравува за судбината на градскиот музеј и на големите споменици кои е невозможно да се евакуираат.

Според ал-Кајим, терористите веќе досега уништиле голем број древни цркви и џамии, ограбиле музеи, а вредните археолошки предмети ги изнесле надвор од Сирија, а сега таква опасност ѝ се заканува на „пустинската невеста“, како што Сиријците ја нарекуваат Палмира, којашто на запад е позната и како „Венеција среден пустина“. Палмира се наоѓа на југозападните рабови на современиот град Тадмур.

„Бунтовниците ги ограбуваат музеите и историските комплекси поради пари, со коишто тие ги финансираат своите следни чекори, а исто така и ги уништуваат историските корени. Тоа се намерни и смислени акти за уривање на сé што нé поврзува со древните цивилизации“, вели сирискиот заменик министер за култура.

Ал-Кајим истакнува и дека историјата се урива под изговорот на џихадистите дека се борат против идолопоклонството, кое е забрането во исламот. Меѓутоа, потсетува дека дури и кога Сирија била дел од исламскиот калифат, античките храмови и колонии, коишто денес се културно наследство на целиот свет, биле сочувани.

Во средата борците на Исламската дражва го заземаа древниот историски комплекс Палмира, на 240 километри североисточно од сириската престолнина Дамаск. Под контрола на џихадистите е историскиот дел од градот во кој се наоѓаат антички храмови и споменици на архитектурата изградени пред и за време на Римската империја.

Сириската државна телевизија објави дека провладините локални милиции во средата г евакуирале населението на Палмира, веднаш по продорот на борците на Исламската држава. Во тие борби загинале најмалку сто припадници на силите лојални на алавитскиот (шиитски) сириски претседател Башар ал-Асад, објави опозициската Сириска опсерваторија за човекови права (SOHR) со седиште во Лондон.

Пламира е впишана на листата на светското наследство на агенцијата на ОН за наука, образование и култура – УНЕСКО, која во средата повика на моментално прекинување на борбите во градот, апелирајќи до меѓународната заедница да стори сé што е неопходно за да се заштити тамошното население и да се сочува ова уникатно културно наследство.

„Важно е сите страни да ги почитуваат меѓународните обврски за во судирот да се зачува културното наследство, избегнувајќи го директното гаѓање, како и користењето во воени цели“, соопшти генералната директорка на УНЕСКО, Ирина Боково, пренесе AFP.

Припадниците на радикалната сунитска организација Исламска држава изминатите месеци ги урнаа и археолошките остатоци од древниот асирски град Дур-Шарукин, во близина со гратчето Хорасабад, 15 километри североисточно од Мосул. Дур-Шарукин е асирски град подигнат од царот Саргон Втори, во периодот кога Асирија била најмоќната земја во тогашниот свет.

Џихадистичката групација Исламска држава во април објави на интернет видео записи на кои нејзините припадници со пукање од пушки и копачи уништуваат споменици на културата во Хатра. Некогашниот партски град Хатра, во провинцијата Нанива, е древен град стар повеќе од две илјади години, кој од 1987 година е прогласена са археолошки локалитет од светското културно наследство, се наоѓа на 110 со километри јужно од Мосул, во северен Ирак.

Советот за безбедност на ОН на 12-ти февруари годинава, ја усвои Резолуцијата 2199 со која за засилува забраната за трговија со антиквитети и културни вредности со коишто се финансира тероризмот./крај/мф/сн

Извор: Макфакс