Сириската армија објави во понеделникот крај на примирјето коешто траеше една седмица, како што беше договорено меѓу Русија и САД, обвинувајќи ги бунтовничките групи кои ги поддржува Вашингтон за неуспехот да се одржи прекинот на огнот, додека американката страна е подготвена да го продолжи и бара од Москва појаснување за овој потег на Дамаск.

„Сириската армија објавува прекин на огнот кој започна на 12-ти септември во 19 часот во согласност со руско-американскиот договор“, се наведува во соопштението што го цитира службената новинска агенција SANA.

„Се претпоставуваше дека режимот на прекин на огнот претставува реална шанса да се стави крај на крвопролевањето, но истовремено терористите (како што официјален Дамаск ги именува сите бунтовнички групи – з.р.), не се придржуваа до ниедна од точките на договорот за прекин на огнот, а бројот на нарушувањата од нивна страна надмина 300“, се додава во цитираната изјава на командата на сириската армија.

Сирискиот воен извор претходно за агенцијата AFP најави дека договорот за прекин на огнот ќе истече во 19 часот во понеделникот.

Договорот кој го постигнаа руските и американските дипломати во почетокот на 12-ти септември по објавувањето на примирјето да се намалат судирите, но кон крајот на минатата седмица насилството повторно ескалираше.

„„Сириските воени сили имаа најголем степен на самоконтрола и покрај кршењето на примирјето од страна на терористичките групи. Вооружените сили ја потврдуваат својата намера и решителност да продолжат со борбата против тероризмот за да ја вратат сигурноста и стабилноста во Сирија“, порачува сириската армија.

Дамаск додава и дека примирјето бунтовничките опозициски групи го искористиле за прегрупирање и мобилизирање на екстремните групи и концентрирање најразлични видови оружје и продолжување на нападите врз цивилни населби, особено врз градовите Алепо, Хама и Кунејтраи

Американскиот државен секретар Џон Кери изјави во понеделникот во Њујорк дека Русија наводно не се придржувала до својот дел од договорот кој инаку Вашингтон одбиваше јавно да биде објавен, но дека „руските и американските функционери во моментов се состануваат во Женева“, како и дека „процесот продолжува“, а во текот на денот ќе се знае повеќе.

Руското министерство за одбрана смета дека се мали шансите дека примирјето ќе продолжи по понеделникот.

„Имајќи предвид дека бунтовниците не ги почитуваат условите за примирјето, сметаме дека е бесмислено сириската војска да го спроведува еднострано“, порача генерал-полковникот Сергеј Рудској. Според него, главниот проблем е што бунтовниците коишто ги подржуваат САД не се одвоија од Џебхат ан-Нусра, бунтовничка група која дејствува како сириски огранок на Ал Каеда, а минатиот месец се преименуваше во Џабхат Фатетех ал-Шам.

САД се подготвени за продолжување на прекинот на огнот во Сирија и од Русија очекуваа појаснување на позицијата на Дамаск во врска со ова прашање се наведува во писмената изјава испратена до светските агенции од шефот на службата за односи со јавноста на Стејт департментот, Џон Кирби кој го придружува Кери во Њујорк на 71-та сесија на Генералното собрание на ОН.

Според портпаролот на американската дипломатија, САД „се подготвени да го продолжиме времетраењето на примирјето“ во Сирија, „истовремено работејќи на неговото зајакнување и проширување на доставувањето на (хуманитарната) помош“.

„Ќе се консултираме со руските колеги, да продолжат да го поттикнуваат и да го искористат за горенаведените цели своето влијание врз (сирискиот претседател Башар ал-)Асад“, истакнува Кирби.

Додава дека американските власти „се запознаени со коментарите, кои им се припишуваат на вооружените сили на Сирија“, за завршување на прекинот на огнот. Но бидејќи Вашингтон го склучил новиот договор за Сирија со Русија а не со Дамаск, тогаш тој очекува Москва да ја „појасни позицијата“ на владата на Асад, истакнува Кирби. Тој тврди дека Русија „ја понесува одговорноста за спроведување од страна на сирискиот режим“ за договорот за прекин на борбените дејствија./крај/мф/сн

Извор: Макфакс