Фронтот (Џебхат) ал-Нусра, сирискиот огранок на глобалната терористичка мрежа Ал Каеда, најави во неделата контраудар „низ целиот свет“ врз земјите на антиџихадистичката меѓународна коалиција предводена од САД којашто ги засили своите воздушни напади врз позициите на радикалните групации во прв ред Исламската држава во Ирак и во Сирија.

Во најновите воздушни удари кои во саботата ги извеле воздухопловните сили на САД, Јордан, Саудиска Арабија и Обединетите Арапски Емирати, гаѓани биле седум цели во Сирија и три во Ирак, соопшти американската воздухопловна команда за Блискиот исток и средна Азија (Centcom).Во видеоснимката што Фронтот ал-Нусра ја објави на интернет во неделата, оваа радикална групација составена од странски борци меѓу кои стотици од земјите од Балканот, операцијата на коалицијата предводена од Вашингтон ја нарекува „војна против исламот“ и ја осуди „оската на злото“ под водство на „земјата на каубоите“.„Тие држави сторија страшен чин со кој ќе се стават на листата цели на џихадистите ширум светот. Учествуваме во долготрајна војна која може да трае со десетици години“, порача на снимката портпаролот на Фронтот ал-Нусра, Абу Фирас ал-Сури, пренесе AFP.САД во август започнаа со воздушни удари врз позициите на џихадистите од Исламската држава на ирачка територија. Оваа група којашто се издвои од Ал Каеда и стана најреспектабилната радикална сунитска исламистичка сила која се појави на сириското боиште минатата 2013 година во борбата заедно со сунитската вооружена опозиција којашто ја поддржува Западот против силите на претседателот Башар ал-Асад кој потекнува од алавитската (шиитска) заедница, а од јуни годинава кога освои значителни територии и во соседен Ирак прогласи калифат. Исламската држава е обвинета дека на териториите кои и контролира извршува масовни свирепи егзекуции а во меѓувреме пред камерите обезглави двајца американски новинари и еден британски хуманитарен активист како одмазда за нападите врз нејзините борци.Од минатата седмица коалицијата ги прошири своите воздушни напади и врз територијата на Сирија. САД во вторникот објавија дека ги „ликвидирал“ припадниците на Хорасан, помала исламистичка групација блиска на Ал Каеда, којашто подготвувала, како што тврди Вашингтон, „големи напади“ во САД и во Европа.Пентагон смета дека Хорасан е поврзана со Фронтот ал-Нусра. Меѓутоа, милитантите и Сириската опсерваторија за човекови права (SOHR) која е на страна на сириската сунитска опозиција, сметаат дека цел на нападот е само Фронтот ал-Нусра, кој на сириското боиште се појави во 2012 година и во почетокот изведуваше операции заедно со опозициска Сириска слободна армија (FSA) против владините сили на Дамаск.Велика Британија во петокот донесе конечна одлука да се приклучи на коалицијата против џихадистите во воздушните операции во Ирак, коишто досега ги изведуваа само САД и Франција. Данска и Белгија, исто така, одлучија да учествуваат во нападите во Ирак, испраќајќи борбени авиони од типот „F-16“. Повеќе земји, во прв ред Русија, но и Словенија како членка на НАТО и ЕУ која е ставена на списокот од 50-ина земји кои учествуваат во коалицијата предводена од САД, сметаат дека воздушните удари, особено во Сирија мора да бидат одобрени од Советот за безбедност на Обединетите нации.Рускиот министер за надворешни работи во саботата од говорницата на 69-то генерално собрание на ОН предупреди дека воздушните удари на сириска територија се незаконски без одобрување на Советот за безбедност и оти мора да се вршат и во координација со власта во Дамаск и истовремено го осуди американскиот воен интервенционизам во светот.„Военото мешање стана правило и покрај слабите резултати на воените операции кои САД ги водеа последната деценија“, истакна Лавров споменувајќи ги во прв ред интервенциите во Ирак, во Либија и во Авганистан./крај/мф/сн

Извор: Макфакс