Сириските бунтовници во средата вечерта соопштија дека со помош на турските сили го ослободиле сирискиот пограничен град Џараблус од џихадистичката организација Исламска држава, по кусата офанзива која завршила за неколку часови.

Џараблус е град со околу 30.000 жители, меѓу кои солиден број се Туркмени, малцинство во Сирија коешто зборува турски, и беше последниот граничен премин кој го контролираше Исламската држава./

„Џараблус е целосно ослободен“, изјавил за AFP Ахмад Отмане, командант на бунтовничка група која учествувала во офанзивата за ослободување на овој град на северот од Сирија, покрај самата граница со Турција. Портпарол на друга бунтовничка група изјави дека џихадистите се повлекле кон Ал-Баб, југозападно од Џараблус.

Турската војска со поддршка на авијацијата на меѓународната коалиција предводена од САД во средата утрото ја започна најголемата воена операција во Сирија од почетокот на конфликтот во март 2011 година во чиешто поттикнување учествуваше и самата Турција.

Турција испрати тенкови, оклопни возила, специјалци и борбени авиони за потиснување на Исламската држава од Џараблус, но и поради оневозможување во градот да навлезат силите на курдско-арапската коалиција предводени од курдската милиција Единици за одбрана на народот (YPG) која претходно од џихадистите го зазема градот Манбиџ и можеше да воспостави коридор со курдските заедници во градот Кобани и во покраината Алепо, со што ќе контролираше голем дел од сириско-турската граница.

САД во оваа операција наречена „Штитот на Еуфрат“ дале разузнавача, извидувачка и советодавна помош. Американците можеле да дадат и поддршка од воздух доколку е потребно, рекол американски воен функционер во придружба на американскиот потпретседател Џозеф Бајден кој во саботата допатува во Турција за да разговара, како што е официјално соопштено, за завршувањето на војната во Сирија при што Анкара сака да има „поактивна улога“.

САД јасно им порачаа на силите на сириските Курди дека мора да се повлечат источно од Еуфрат откако го заземаа сирискиот град Манбиџ доколку сакаат да ја задржат американската поддршка, изјави во средата во турската престолнина Анкара Бајден во придружба на турскиот премиер Бинали Јилдирим

„Тие не можат, и нема, под никакви услови да имаат американска поддршка доколку не ја исполнат својата обврска, и точка“, порача американскиот потпретседател, пренесе Reuters.

Јилдирим, пак, повтори дека Турција „нема да трпи никакво курдски ентитет на својата граница“ со Сирија.

Турција и Исламската држава и Партијата на демократското единство (PYD) на сирискитe Курди ги смета за терористички организации . Особено поради тоа што PYD во битката за сирискиот курдски град Кобани против џихадистите ја имаше поддршката од забранетата во Турција Работничка партија на Курдистан (PKK) против која од минатото лето води широка офанзива. Меѓутоа, САД иако турски сојузник, ги подржуваат Курдите во Сирија кои на теренот успеаја да ги потиснат џихадистите.

Анкара е вознемирена од обидите на сириските Курди да создадат автономна територијална област по должината на нејзината граница, која ја прогласија уште во 2015 година, а на што се противи и официјален Дамаск.

Русија, којашто воено го помага сирискиот претседател Башар ал-Асад, соопшти дека е „силно загрижена“ поради турската операција и можното влошување на тензиите меѓу Анкара и курдските милиции.

Франција, пак, го пофали „јакнењето на турските напори во борбата против Исламската држава“./крај/мф/сн

Извор: Макфакс