Милицијата на сириските Курди, која е водена од американските специјалци, започна во понеделникот голема напад за да ги освои последните делови од североисточниот град Хасака, кои се под контрола на силите на владата на Сирија, што според аналитичарите е стратегија на САД да се ослаби притисокот на силите на сирискиот претседател Башар ал-Асад врз сунитските бунтовници во градот Алепо, коишто ги поддржува Вашингтон.

Курдските Единици за одбрана на народот (YPG) по полноќ започнале офанзива на јужниот дел на Хасака, во близина на канцеларијата на гувернерот на истоимената покраина, изјавиле за Reuters очевидци и курдски извори.

Борбите коишто започнаа овие денови за Хасака се првите судири меѓу курдските и сириските владини сили од избувнувањето на сириската војна во март 2011 година, кога војската на претседателот Башар ал-Асад без конфликти се повлече од покраините во кои мнозинство се Курдите. Се смета дека сегашните борби се дел од пошироките настојувања за контрола на пограничната зона кон Турција.

По утринското затишје во борбите, судирот продолжил низ целиот град, пренесува за AFP опозициската Сириска опсерваторија за човекови права (SOHR) со седиште во Лондон. Таа тврди дека моќната YPG помогнати стратешки од американските специјалци наводно го заземала речиси целиот исток на Гваиран, единствената поголема арапска населба која била под контрола на владините сили.

Вашингтон тврди дека YPG е негов клучен сојузник во борбата против Исламската држава, кој контролира поголем дел од северот каде курдските групи поврзани со оваа милиција прогласија своја „автономна област“ и своја влада. Меѓутоа, во последно време очигледно станува дека курдските борци се насочени да не дозволат контрола над овие територии на силите на официјален Дамаск. Исто така, на зајакнувањето на YPG на нејзините граници не гледа благонаклоно и Анкара, бидејќи тврди дека сириските Курди соработуваат со забранетата во Турција Работничка партија на Курдистан (PKK), против која од минатото лето турските безбедносни сили водат широка операција.

Турција, којашто е членка на НАТО, покрај справувањето со курдскиот бунт на својата територија, е загрижена и за обидите на сириските Курди да се пробијат западно од нејзината граница. За да ги попречи тоа, Турција им дозволи на сириските сунитски бунтовници кои се обединети како Слободна сириска армија (FSA) да се групираат на нејзината територија пред да нападна град кој од другата страна го контролира Исламската држава.

Силите на сириската влада минатата седмица првпат ги испратија своите борбени авиони во напад врз позициите на Курдите, поради што САД мораше да ги премести своите авиони за да ги заштити американските операции на копното. Дури и новиот командант на американските сили за Сирија и Ирак, генералот Стивен Таунсенд реагираше до Москва за да влијае врз Дамаск да не ги загрози американските операции на копното.

Сириските борбени авиони надлетувале крај Хасака и во понеделникот, но не бомбардирале, пренесува SOHR.

Сириските државни медиуми објавија дека милициите Асајиша, кои се поврзани со YPG, го кршат примирјето и ги палат државните згради во Хасака.

Курдите, пак, иако нивни извори за AFP претходно потврдиле дека е постигнато примирје кое треба да стапи на сила од среда, отфрлаат дека е договорено примирје и дистрибуираат летоци, и преку звучници ги повикуваат владините војници и провладините милиции да се предадат.

„На сите елементи на режимот и на нивните милиции, кои се опколени во градот им порачуваме дека се на нишанот на напите единици. Оваа битка е одлучена и нема да се повлечеме. Ве повикуваме да се предадете и да го предадете своето оружје или сметајте се за мртви“, се наведува во летоците./крај/мф/сн

Извор: Макфакс