Можноста да биде постигнат сеопфатен договор за иранската нуклеарна програма до рокот кој истакнува во понеделник се се’ помали, а претставниците на Иран и шесте светски сили кои преговараат во австриската престолнина Виена признаваат дека уште се далеку од крајната цел, но има подготвеност ткн Виенскиот круг од преговорите да биде продолжен за уште неколку дена.
 

Можноста да биде постигнат сеопфатен договор за иранската нуклеарна програма до рокот кој истакнува во понеделник се се’ помали, а претставниците на Иран и шесте светски сили кои преговараат во австриската престолнина Виена признаваат дека уште се далеку од крајната цел, но има подготвеност ткн Виенскиот круг од преговорите да биде продолжен за уште неколку дена.

Во овој спор кој ги обременува, како регионалните така и глобалните меѓународни односи повеќе од една деценија, големите сили и Иран се согласуваат во признавањето дека постојат големи разлики и натаму, иако за два дена, до претходно зададениот краен термин 24-ти ноември, треба да го постигнат конечниот договор со кој Техеран ќе ја ограничи својата нуклеарна програма особено збогатувањето на ураниумот, за кој во прв ред Западот смета дека ги сокрива вистинските намери да се дојде до нуклеарно оружје, а за возврат ќе бидат симнати санкциите коишто значително ѝ наштетуваа на иранската економија.

„Време е за вистината“, изјави германскиот министер за надворешни работи Франк-Валтер Штајнмаер по пристигнувањето во Виена каде што имаше одвоени разговори со американскиот државен секретар Џон Кери и со шефот на иранската дипломатија Мохамад Џавад Зариф.

Кери призна дека и натаму постојат големи разлики со Иран и истакна дека сите напорно работат за да се постигне напредок.

„Никогаш не сме биле толку близу до договор, а се’ уште сме далеку од него“, нагласи Штајнмаер и додаде дека исходот од преговорите во целост е отворен.

Од иранска страна извор близок на делегацијата во Виена за AFP, исто така, признава дека јазот и натаму е голем и оти бара политичка одлука на сите вклучени влади.

Според еден европски анонимен извор, исто така, близок до преговорите, изгледите за целосен договор до понеделник се чинат „физички невозможни“, бидејќи не е остварен никаков значителен напредок. „Дури и да постигнеме политички договор, техничките анекси не се подготвени“, додал овој извор.

Од друга страна, Иран не ги губи надежите за изработка на документот од преговорите со „шестката“ и е подготвен за продолжување на преговорите во Виена за уште неколку дена, изјавил за руската агенција ТАСС извор во иранската делегација. „Се’ уште очекуваме да дојдеме до компромис. Се обидуваме и вложуваме максимални напори да го постигнеме тоа, продолжуваат интензивните контакти“, додал соговорникот.

Запрашан за можноста за продолжување на преговорите за уште неколку дена, изворот потврдил дека постои таква опција. Претходно запознаен со текот на преговорите во Виена соговорник на ТАСС, изјави дека сегашната рунда од преговорите може да биде продолжена за уште неколку дена, доколку страните се убедат дека има шанса да биде постигнат договор. „Министрите од ‘шестката’ коишто дојдоа во главниот град на Австрија, се подготвени да останат до 25/26-ти ноември“, додал.

Покрај тоа, друг соговорник изјавил дека најострата позиција на преговорите во Виена ја зазема Франција. „Во моментов најтврдата позиција ја има француската делегација“, рекол соговорникот на агенцијата без да прецизира во што е суштината на ставовите на Франција.

„Средбите (билатерални) во рамките на преговарачката рунда продолжуваат, консултациите минаа во многу интензивна фаза“, додал.

Групата „пет плус еден“, петте постојани членки на Советот за безбедност при ОН – САД, Русија, Кина, Велика Британија и Франција плус Германија, и Иран од другата страна, се обидуваат до понеделник да го склучат договорот со кој ќе се стави крај на 12 години долгите меѓународни тензии за иранската нуклеарна програма за којашто Техеран вели дека е негово суверено право и дека му служи исклучиво за цивилни цели, односно за добивање електрична енергија и во медицински истражувања./крај/мф/сн

Извор: Макфакс