Претседателот на најголемата исламистичка партија во Бангладеш е осуден во средата на смртна казна на судот формиран за процесуирање на воените злосторства во текот на војната за независност од 1971 година.

Специјалниот суд за воени злосторства му ја изрече смртната каза на 71-годишниот Матиур Рахман Низами, челникот на партијата Џамат-е-Ислами,поради неговата вмешаноста во убиства, силувања, поттикнување на верска омраза и други злосторства против човечноста во текот на деветмесечната војна. Меѓу другото, прогласен е виновен за раководење на масакрот врз професори, писатели и лекари.

„Ова е историска пресуда“, изјави специјалниот државен обвинител Хахдер Али.

Неколку стотици луѓе пред зградата на судот ја поздравија пресудата и побараа од владата Низами веднаш да биде погубен. Неговиот адвокат, пак, најави жалба на пресудата.

Војната од 1971 година заврши со создавање на државата Бангладеш, а станува збор за покраина која од 1947 година беше во состав на Пакистан, и се нарекуваше Источен Бенгал а подоцна и Источен Пакистан.

Премиерката Шеик Хасина Вазед го воспостави судот во 2010, откако првиот обид за судење на осомничените за убиства беше прекинат во 1975 година кога беше убиен Шеик Маџибух Рахман, втемелувач на државата Бангладеш и татко на сегашната премиерка.

Специјалниот суд досега подигна обвинение против 18 лица, главно од партијата Џамат-е-Ислами, по разни точки а смртни казни се изречени за 11 од нив. Партијата Џамат-е-Ислими се противеше на независноста во текот на конфликтот, а споменатите процеси ги отфрла како политички мотивирани.

Во текот на интервенцијата на Индија кон крајот на судирите во 1971 година, која што го најави брзиот пораз на пропакистанските сили, милициите кои беа наклонети кон Исламабад масакрираа десетици познати професори, режисери, уметници, лекари и новинари. Владата во 2010 година го формираше судот ICT и истакна дека тие процеси се неопходни за да се затворат сé уште отворените рани од војната за независност. Меѓутоа, исламистичката партија Џамат-е-Ислам ја обвинува владата дека го основала овој од политички мотиви, бидејќи најмногу им се суди на претставници на опозицијата. Организацијата Human Rights Watch ги критикуваше процедурите со кои не се почитуваат меѓународните норми.

На почетокот од август минатата 2013 година судовите ја забранија исламистичката партија Џамат-е-Ислам, одлука која беше донесена пред одржување на изборите закажани за јануари годинава. Џамат ретко добива повеќе од 5 отсто гласови на изборите по 1970 година, но учествуваше во неколку коалициски влади.

Последните неколкуте години политичката и безбедносната ситуација во Бангладеш е влошена во врска судењата на лидерите на најголемата исламска партија во земјата Џамат-е-Ислами кои се обвинети за воени злосторства за време на војната за независност на Бангладеш од Пакистан во 1971 година. Според податоците на владата во војната од 1971 година загинале 3 милиони луѓе, додека независните организации проценуваат дека станува збор за меѓу 300 и 500 илјади жртви. Околу 90 отсто од 153-те милиони жители на Бангладеш се муслимани. Будистите претставуваат помалку од еден отсто од населението и живеат повеќето во југоисточните окрузи, во близина на границата со мнозинскиот будистички Мианмар.

На судење чекаат уште девет членови на партијата Џамат, и затоа на Бангладеш, претежно муслиманска земја, му се закануваат нови бранови насилство.

Бангладеш станал дел од Пакистан кога е укината британската колонијална управа во 1947 година. Тогаш се нарекувал Источен Пакистан, меѓутоа со помош на Индија во деветмесечната војна против Западен Пакистан, се избори за независност. Џамат-е-Ислами и некои други партии се противеа на отцепувањето од муслиманскиот Пакистан./крај/мф/сн

Извор: AFP