Најмалку 15 Палестинци, според болнички извори, се убиени ноќта кон саботата во израелските воздушни напади врз десетина цели во палестинската енклава Појасот Газа, со што бројот на загинати од почетокот на израелската офанзива пред пет дена се искачи на 121, додека меѓународната заедница безуспешно повикува на мир.

Во последниот напад за кој јавуваат агенциите, во Беит Лахи во северниот дел на Појасот Газа, убиени се две лица, а уште три смртно настрадале во друг напад западно од градот Газа, изјавил портпаролот на палестинската служба за вонредни ситуации Ашраф ал-Кудра. Израелската воена портпаролка изјавила дека Израел гаѓал 60 цели во текот на ноќта кон саботата, со што од почетокот на воздушната офанзива од вторникот се гаѓани вкупно илјада палестински цели, пренесува германската агенција DPA.Кратко пред почетокот на традиционалниот еврејски шабат, израелскиот премиер Бенјамин Нетанјаху изјави дека Израел не се согласува на никакво меѓународно мешање во потенцијалниот прекин на огнот, пренесува агенцијата AFP. „Никаков меѓународен притисок нема да нѐ спречи во нападите врз терористите кои нѐ ракетираат“, изјавил Нетанјаху на прес-конференција одржана во министерството за одбрана во Тел Авив.Во телефонскиот разговор со израелскиот премиер, американскиот претседател Барак Обама педложи посредување со цел да се воспостави мир, и истовремено изрази стравување од „натамошно ескалирање на судирите“.„САД и натаму се подготвени да се ангажираат да се постигне прекин на непријателствата, вклучително и враќање на договорот за прекин на огнот од ноември 2012 година“, соопшти Белата куќа, додавајќи дека Вашингтон и натаму исламистичката палестинска организација Хаамс која Појасот Газа го држи под контрола од кусотрајната војна со ривалското движење Фатах во 2007 година, ја смета за „терористичка организација“. САД се подготвени да ја употребат својата мрежа на Блискиот исток за да се „направи обид за престанок на ракетирањето од областа Газа и, како што видовме утрово, од Либан“, изјави портпаролот на Белата куќа, Џош Ернест.Додека судирот станува сѐ покрвав, меѓународната заедница повикува на мир. Во четвртокот на итната седница на Советот за безбедност при Обединетите нации, генералниот секретар Бан Ки-Мун повика на прекин на огнот. Високата комесарка за човекови права на ОН, Нави Пилај, во петокот изрази сериозно сомневање дека Израел со воените операции во Појасот Газа го крши меѓународното право кое не дозволува гаѓање цивилни цели. Пилај ги повика двете страни да ги почитуваат правилата на војувањето.Се чини дека како и Нетанјаху, ниту челникот на Хамас, Гази Исмаил Ханија во овој момент не е подготвен на примирје. Како што извести Израелската армија, Хамас и неговото радикално воено крило Исламистички џихад, во последните пет дена истрелале околу 660 гранати и ракети, но израелскиот противракетен систем „Челична купола“ пресретнал 140 од нив.Судирите постепено се шират на северниот дел од Израел, особено по ракетирањето од либанска територија во кое немало жртви. Израелската артилерија на тие напади одговорила гаѓајќи едно јужно либанско село.Командантот на генералштабот на израелската армија, генералот Бени Ганц предупреди дека израелските војски „ќе ги засилат и прошират своите активности зависно од потребите, како и дека ќе нападнат „со сите расположливи средства“. Веќе се мобилизирани околу 40 илјади резервисти. Нападите врз Газа ги разлутија земјите коишто граничат со Израел. „Израел тврди дека припадниците на Хамс истрелуваат ракети. А дали некој смртно настрадал?“, запраша турскиот премиер Реџеп Тајип Ердоган, чијашто земја се обидува да ги поправи порано многу тесните врски со Израел кои беа прекинати по инцидент со хуманитарни пропалестински активисти во 2011 година, а во последно време одржува контакти со Хамас. Ердоган ги обвини Израелците дека „лажат“, а Египет во петокот ја осуди израелската „политика на колективно казнување“ во Газа за терористичките напади, и ја повикаа меѓународната заедница неодложно да стави крај на судирот.Имајќи предвид дека се влошува состојбата во Појасот Газа, 34 хуманитарните организации повикаа на прекин на огнот и почитување на човековите права на палестинската територија под израелска блокада. Најголемото непријателство меѓу Израел и Палестинците по осумдневната војна кон крајот на 2012 година кога загинаа над илјада Палестинци и стотина Израелци, започна со неодамнешните грабнувања на трите израелски тинејџери кои беа пронајдени мртви во другата палестинска енклава Западниот брег (на реката Јордан) за што беа обвинети палестинските радикални исламисти, за потоа и грабнувањето на палестинскиот тинејџер кој жив бил запален во источен Ерусалим, како одмазда од страна на екстремните еврејски активисти./крај/мф/сн

Извор: AFP/DPA