Сопрена е операцијата за потрага по индонезискиот патнички авион со 54 патници и членови на екипажот, кој исчезна од радарите во неделата претпладнето, објави портпаролот на службата за потраги и спасување во градот Џајапура, од каде што полетал авионот.

„Во моментов запрени се активностите за пребарување на копното, бидејќи падна вечерта. Ќе ја продолжиме потрагата во понеделник во 6 часот (околу полноќ по македонско време)“, изјавил за локалните медиуми претставник на спасувачките служби Според него, маршрутата на летот на авионот се движела над тешко пристапни планински области.

Претходно во неделата од компанијата „Trigana Air Service“, која е сопственик на исчезнатиот авион, објавија дека авионот кој бил испратен во потрага од воздух се вратил на матичниот аеродром, поради крајно лошите временски услови.

Според оцените на министерството за транспорт на Индонезија, во областа каде што авионот од типот „ATR 42-300“ исчезнал од радарите, над територијата на покраината Папуа, „има голема облачност“.

Националната новинска агенција Antara повикувајќи се на шефот на полициската управа на покраината Патриџ, потврди дека на летот IL267 од главниот град на покраината Џајапура до Оксибал, имало 49 патници, од кои пет малолетници, и пет членови на екипажот.

Контролата на летањето го загубила контактот со авионот околу 30 минути по полетувањето од аеродромот „Сентаи“ крај Џајапура. Авионот во Оксибил требало да слета во 15,15 часот по локално време (8.30 по македонско време), но диспечерите не успеале да стапат во контакт со пилотот.

Според специјализираните портали коишто ги следат воздухопловните несреќи, авионот бил во употреба околу 30 години. Компанијата „Trigana Air Service“ е формирана во 1991 година, а во моментов нејзиното седиште е во индонезиската престолнина Џакарта. Флотата на компанијата се состои од 15 патнички авиони, од кои седум од типот „ATR 42-300“, три „ATR 72-200“ и четири „Boeing 737-400“, како и неколку товарни воздухоплови. Компанијата ги сервисира само домашните летови.

Инаку воздухопловните несреќи во Индонезија не се реткост, особено во покраината Папуа во источниот дел од земјата која се протега на најголемиот архипелаг на планетава, каде што има слабо развиена инфраструктура. Во средата едно лице загина и уште шест беа тешко повредени при пад на мал патнички авион „Cessna“ кој се урна при обид да полета од писта на голема надморска височина на аеродромот Ниниа, исто така, во покраината Папуа.

Во јануари годинава мал патнички авион од типот „DHC-6“, исто така, во сопственост на компанијата „Trigana Air Service“ доживеа несреќа при обид принудно да слета на аеродромот кај Енортали на Папуа. Во септември минатата година повеќе од десет луѓе беа повредени кога мал авион на компанијата „Enggang Air“ слета 400 метри подалеку од пистата на аеродромот Мулиа, исто така, на Папуа.

Најголемата авионска несреќа на овој остров се случи, пак, во соседната покраина Западна Папуа во мај 2011 година, кога патничкиот авион од кинеско производство „Xian MA60“ на индонезиската компанија „Merpati“ се уран во морето при обидот да слета во градот Соронг. Тогаш загинаа 21 патник и шест членови на екипажот.

На 30-ти јуни годинава, пак, се случи една од поголемите несреќи во историјата на индонезиското воздухопловство, кога воениот авион од типот „Hercules C-130“ неколку минути по полетувањето се урна врз населба на индонезискиот град Медан. Притоа загинаа 122 патници и 12 членови на екипажот, како и неколку луѓе на земјата. Причината за оваа несреќа сé уште не е официјално соопштена, но се смета дека е дефект на моторот./крај/мф/сн

Извор: Макфакс