Советот за безбедност при Обединетите нации ноќта кон понеделникот на итно свиканата седница едногласно ја прифати декларацијата со којашто се повикува на моментален и безусловен прекин на огнот во палестинската енклава Појасот Газа каде во меѓувреме борбите престанаа со приближувањето на муслиманскиот празник Рамазански бајрам, а израелската армија официјално потврди дека ги сопира „активните дејствија“ во енклавата на неопределено време.

Петнаесетте земји членки на Советот за безбедност при ОН се состанаа на итното заседание во седиштето на светската организација во Њујорк и во изјавата изразија „целосен моментален и безусловен хуманитарен прекин на огнот кој ќе овозможи доставување на итната и неопходната помош“. Ги повикуваат Израел и палестинското исламистичко движење Хамас кое од 2007 година ја контролира енклавата Појасот Газа „целосно да го применат“ прекинот на огнот во текот на муслиманскито празник Рамазански бајрам со кој завршува месецот на постот за муслиманите „и по празниците“.

Советот за безбедност на ОН со споменатата изјава ги повикува страните „целосно да го почитуваат меѓународното хуманитарно право, во прв ред одредбите за заштита на цивилите“, како да „спроведат траен и целосно почитуван траен прекин на огнот врз основа на посредничката египетска иницијатива“. Со изјавата, исто така, се повикува и на доставување хуманитарна помош на палестинското население во Појасот Газа, како и на зголемување на помошта за UNRWA, агенцијата на ОН за палестинските бегалци.

Три дена по крвавото бомбардирање на едни училиште на ОН во Газа во кое загинаа дваесетина луѓе од кои барем половината деца, Советот за безбедност „истакнува дека цивилните и хуманитарни институции, меѓу кои се и оние на ОН, мора да бидат почитувани и заштитени, и исто така се повикуваат сите страни да се придржуваат до тоа начело“. Израелската армија ка отфрла одговорноста за нападот врз училиштето во Беит Ханин во четвртокот.

„Претседателската декларација (на Советот за безбедност на ОН) ги повика сите страни и меѓународната заедница да постигнат глобален мир“ на Блискиот исток, заснован на решението за двете држави, израелска и палестинска, кои мирно живеат една крај друга.

Американскиот претседател Барак Обама во неделата доцна навечер лично интервенираше барајќи од израелскиот сојузник да прифати „безусловен и моментален“ прекин на огнот со Хамас во Појасот Газа, каде што според агенциските извештаи опаѓа интензитетот на борбите со приближувањето на празникот.

Генералниот секретар на ОН, Бан Ки-мун повика да биде продолжен 12-часовнито хуманитарен прекин на огнот прогласен во саботата.

Од почетокот на израелската офанзива „Линија на одбраната“ во Појасот Газа на 8-ми јули, чијашто цел е сопирање на ракетирањата на Хамас врз јужните и централните области на Израел, како и уништување на подземните тунели и инфраструктурата на исламистичкото движење, загинаа над 1.060 Палестинци, од кои повеќето се цивили, како и 43 израелски војници и тројца цивили.

Агенцијата AFP, повикувајќи се на портпаролот на израелската армија, пренесува дека ниедна ракета не е истрелана од Појасот Газа кон израелските територии, како да ниту Израел извел напад од 23 часот во неделата по локално време.

Во понеделникот претпладне Војската за одбрана на Израел официјално го потврди стопирањето на активностите во Појасот Газа на неопределено време. Новиот формат на операцијата претпоставува само реагирање на секој палестински напад, а исто така и ограничување на трагањето и уништување на палестинските подземни тунели кои излегуваат дури на израелска територија.

„Армијата ги сопира сите активни дејствија во Појасот Газа. Работата за ликвидација на тунелите продолжува. На секој обид за агресија ќе биде одговорено“, изјави за РИА Новости портпаролката на израелските сили. Соговорничката на агенцијата прецизирала дека рокот на прекинот огнот не е временски определен.

Сепак, израелски воени извори изјавиле дека во понеделникот претпладне е регистрирани само еден случај на ракетирање од палестинските позиции, на кои имало соодветно дејствување на израелската армија, што биле досега единствените воени дејствија. /крај/мф/сн

Извор: Макфакс