Советот за безбедност при Обединетите нации ноќта кон саботата ги повика земјите да ги преземат сите неопходни мерки во согласност со меѓународното право за борба против есктремната сунитска групација Исламска држава (IS) и другите терористички организации во Ирак и во Сирија, како и елиминирање на засолништата на екстремистите на териториите на двете земји, по резолуцијата поднесена од Франција, која едногласно беше поддржана од петнаесетте постојани и непостојани членки на Советот.

Со резолуцијата се „бара од сите држави во согласност со меѓународните закони, а особено со повелбата на ОН, да ги преземат сите потребни мерки на територијата во Ирак и во Сирија којашто ја контролира Исламската држава“. Земјите, исто така, се повикуваа „да ги удвојат напорите и да ги координираат своите иницијативи за д се спречат и запрат терористичките напади“ од страна на Исламската држава и другите екстремни групации поврзани со Ал Каеда.

Советот за безбедност на ОН ја нарекува Исламската држава светска закана без преседан за меѓународниот мир и безбедност“, и изјавува дека е „решителен да се бори против таа закана со сите средства“.

Францускиот министер за надворешни работи, Лорен Фабиус, го поздрави во соопштение текстот на резолуцијата кој „повикува на ширењето на борбата“ против Исламската држава. „Сега е важно сите земји конкретно да се ангажираат во борбата, дали со воени активности, со барање политички решенија или во борбата против финансирањето на тероризмот“, додаде шефот на француската дипломатија којашто е автор на прифатениот текст од резолуцијата.

Резолуцијата не зборува директно за дозволување на воено дејствување, ниту повикува на примена на Членот 7 од Повелбата на ОН која предвидува примена на сила. Меѓутоа, дава политичка поддршка во борбата против џихадистите во Сирија и во Ирак којашто се засили по 13-ноемвриските терористички напади во француската престолнина Париз за коишто одговорноста ја презема Исламската држава.

Со резолуцијата, покрај осудата на нападите во Париз со 130 мртви, се осудуваат и нападите кои во октомври во Тунис со 40 мртви, во Анкара од 10-ти октомври со 102 убиени, во либанската престолнина Бејрут со 44 жртви, и уривањето на рускиот патнички авион на 30-ти октомври во Египет со 224 загинати, за кои одговорноста ја презема Исламската држава.

Резолуцијата беше изгласана во моментите на завршувањето на заложничката криза во хотелот во центарот на малиската престолнина Бамако, во која според официјалните податоци на тамошните власти загинаа 27 цивили. За овој напад одговорноста ја презема џихадистичката група Ал Мурабитун, којашто е основана од бараниот алжирски терорист Моктар Белмоктар, и според некои извори, оваа група ѝ изразила лојалност на екстремната сунитска група Исламска држава, а според други, пак, дејствува како една од африканските ќелии на Ал Каеда.

Со резолуцијата се повикуваат сите држави „да ги зајакнат мерките“ во спречувањето на своите државјани да ѝ се приклучуваат на Исламската држава, предвидува и преземање нови санкции од страна на ОН против водачи и членови на групата, како и против нивни приврзаници.

Русија претходно во средата му предложи на Советот за безбедност на ОН да прифати нова резолуција на нацрт-резолуцијата којашто рускиот претседател Владимир Путин ја поднесе кон крајот на септември. Меѓутоа, овој текст засега го отфрла Западот по инсистирање на САД, бидејќи предвидува вклучување на владата на сирискиот претседател Башар ал-Асад во борбата против сунитските екстремистички групи./крај/мфсн

Извор: Макфакс