Советот за безбедност при Обединетите нации на итните консултации во средата вечерта „силно го осуди“ новото нуклеарно тестирање од страна на Северна Кореја и објави дека ќе подготви „дополнителни мерки“ против таа земја, што е дипломатски еуфемизам кој всушност значи санкции.

Во изјавата на Советот за безбедност на ОН којашто е усвоена едногласно, вклучително и со согласноста на единствениот сојузник на Северна Кореја – Кина, 15-те земји членки наведуваат дека одлучиле „веднаш да започнат да работата на дополнителните мерки“, коишто ќе бидат опфатени со „нова резолуција на Советот за безбедност“. Притоа агенцијата AFP наведува дека преговорите за тој нов текст би можело да потраат неколку дена.

Во изјавата не се прецизира за кои „дополнителни мерки“ точно ќе стане збор, а поимот санкции директно никаде не се споменува, но како една од можностите за кои зборувале анонимно дипломатски извори за светските агенции било проширување на списокот личности и компании кои се под санкции поради поврзаност со нуклеарната програма на Северна Кореја и кој во моментов опфаќа 20 компании и 12 лица.

„Членките на Советот за безбедност потсетуваат дека уште претходно изразија спремност да преземат натамошни значителни мерки доколку се случи ново нуклеарно тестирање од страна на Демократска Народна Република Кореја. Имајќи ја предвид таа одлука и тежината на прекршокот, членките на Советот за безбедност веднаш ќе започнат да работат на тие мерки во нова резолуција…..“, изјави постојаниот претставник на Уругвај во ОН, Елбио Росели, кој во јануари претседава со советот.

Заседанието го побараа САД, Јапонија и Јужна Кореја, откако Северна Кореја објави дека го извела четвртиот нуклеарен тест, овојпат со хидрогенска бомба, а во изјавата којашто по завршетокот на заседанието ја прочита амбасадорот Росели се истакнува дека земјите членки на Советот за безбедност новиот севернокорејски нуклеарен тест го сметаат за „флагрантно кршење“ на претходните резолуции на Советот.

Неколку резолуции на Советот за безбедност на ОН ѝ забрануваат на Северна Кореја какви и да се нуклеарни или балистички активности под закана со санкции. Новиот нуклеарен обид веднаш го осудија најголемите светски сили и генералниот секретар на ОН, Бан Ки-мун, како кршење на резолуциите.

Сите претходни нуклеарни тестирања, во октомври 2006, во мај 2009 и во февруари 2013 година предизвикаа зајакнување на санкциите, коишто во прв ред се однесуваат на банки и компании поврзани со нуклеарните или балистички активности на Пјонгјанг.

Северна Кореја во средата утрото објави дека спровела успешно тестирање на хидрогенска бомба (Х-бомба), оружје коешто ја искористува енергијата на нуклеарната фузија и која е повеќекратно помоќно од атомските бомби (А-бомби) во кои енергијата се ослободува со фисија на елементи како ураниум или плутониум. Веста за успешното тестирање на хидрогенската, или термонуклеарната бомба, севернокорејската телевизија ја објави неколку часа откако агенциите за следење на сеизмичките активности од повеќе земји детектирале земјотрес со магнитуда од 5,1 степени по Рихтер во близина на севернокорејскиот комплекс за испитување на нуклеарно оружје.

Светските сили и организациите веднаш остро го осудија севернокорејското тестирање, но експертите ширум светот изразија сомневање во тврдењата на Пјонгјанг, тврдејќи дека регистрираната сеизмичка активност несоодветствува на експлозија којашто би ја предизвикала хидрогенска бомба./крај/мф/сн

Извор: Макфакс