Пилотот на рускиот бомбардер „Су-24“ кој во вторникот беше соборен од турски „F-16“ во близина на сириско-турската граница, а беше извлечен ноќта кон средата во операција на руските и сириските специјалци, тврди дека од турска страна немало никакво предупредување оти наводно го нарушиле воздушниот простор на земјата и оти ќе бидат нападнати.

„Немаше никакво предупредување. Ниту преку радиоврските, ниту визуелно. Воопшто немаше контакт. Оттаму ние минавме во борбен курс во нормален режим. Треба да се знае каква е брзината на бомбардер, а каква на ловец ‘F-16’. Доколку сакале да нé предупредат, ќе можеа да се покажат летајќи во паралелен курс (со рускиот ‘Су-24’ –з.р.). Но такво нешто немаше. Ракетата дојде во опашката на авионот неочекувано. Дури ни визуелно не ја забележавме, за да успееме да направиме маневра за избегнување проектил“, изјави рускиот полот за новинарите во сирискиот град Латакија.

Навигаторот на бомбардерот „Су-24“ ја исклучи можноста дека рускиот авион навлегол во воздушниот простор на Турција, беше пренесено на програмата на руската државна телевизија Россия 1.

„Тоа (нарушувањето на турскиот воздушен простор) е исклучено, дури ни за секунда, особено поради тоа што летавме на височина од 6.000 метри, времето беше јасно, или како што велиме во сленг ‘милион на милион’. Имав целосна контрола на целиот наш лет до моментот на експлозијата на ракетата. Прекрасно гледав, и според карата и според месноста, каде е границата и каде се наоѓаме ние“, тврди рускиот пилот.

Претходно агенцијата Reuters, повикувајќи се на неименуван извор од администрацијата на американскиот претседател пренесе дека во САД сметаат дека рускиот авион навистина бил соборен во сирискиот воздушен простор „врз база на регистрираните термички траги на авионот“. Друг американски извор, пак, претходно изјави дека „упадот“ на рускиот воен авион во турскиот воздушен простор „траел многу кусо“.

Велејќи дека „со нетрпение чека да се врати во својата единици“ во базата Хмејмим, спасениот руски пилот истакна дека екипажот на соборениот „Су-24“ повеќепати извршувал борбени мисии во областа каде што се случи инцидентот, и го познавале „како своите пет прсти“. „Како навигатор го познавам секоја височинка таму. Можам да се ориентирам таму дури и без инструменти“, рече.

Во вторникот вечерта беше соопштено дека еден од пилотите на соборениот руски авион е убиен со оган од земја а по другиот се трага.

Сириските бунтовници од туркменските бригади, кои се сириски државјани а имаат турско етничко чувство и се поддржувани од Турција, тврдеа дека ги убиле двајцата руски пилоти. На интернет беше поставено видео на бунтовнички борци околу мртвото тело на рускиот пилот, кои извикуваат во слава на Алах и според преводот жалат што не го запалиле неговото тело. Неименуван турски владин извор за медиумите изјави во вторникот вечерта дека двајцата пилоти можеби се живи и дека Анкара работи на нивно ослободување.

Москва тврди дека рускиот авион бил гаѓан над територијата на Сирија, на најмалку еден километар од воздушниот простор на Турција. Местото на падот на „Су24“ е четири километри во сириска територија.

Во спасувачката мисија сириските сунитски бунтовници кои ги подржува Западот и Турција со ракета уништија руски хеликоптер кој бил во спасувачка мисија во покраината Латакија, откако хеликоптерот бил погоден, а притоа загинал еден руски маринец поради што Русија ги групира силите во споменатата област и предупредува дека ќе уништи сé што ќе го смета за потенцијална закана.

Бунтовничката група која е вооружена со американски ракети „Tow“ тврди дека нејзините припадници во лет погодиле руски хеликоптер со противтенковска граната. На видео снимка објавена подоцна, чија автентичност не е потврдена, се гледа како друг бунтовник го разнесува хеликоптерот со уште една ракета.

Хеликоптерот од типот „Ми-8“, кој бил ангажиран во спасувачка мисија во Сирија бил погоден при што еден припадник на поморската пешадија е убиен, изјави во вторникот началникот на операциите на рускиот Генералштаб, генерал-полковникот Сергеј Рудскиј. Тој потврдил дека леталото подоцна е уништено.

Во спасувачката операција на местото на приземјување на руските пилоти од претходно соборениот „Су-24“ учествувале два хеликоптера „Ми-8“./крај/мф/сн

Извор: Макфакс