Најверојатниот кандидат на Републиканската партија за американските претседателски избори на 8-ми ноември, милијардерот Доналд Трамп и претседателот на Претставничкиот дом, републиканецот Пол Рајан, изјави дека е потребно обединување за демократите да бидат поразени.

Нивното заедничко соопштение е објавено по средбата во Вашингтон, која се случи во периодот на зголемување на раздорот во редовите на Републиканската партија околу партиската номинација на Доналд Трамп во трката за Белата куќа.

Трамп во четвртокот се сретна и со партиските челници на републиканците кои се колебаат јавно да истапат со поддршка за неговата кандидатура, во надеж дека склучениот мир со нив, а коишто одамна го критикуваат, меѓу кои беше и самиот Пол Рајан, конзервативниот 40-годишник кој ланскиот октомври ја започна модернизацијата на имиџот на Републиканската партија.

Рајан ја изненади политичката јавност во САД минатата седмица кога изјави дека не е подготвен да го поддржи Трамп. Тоа е изненадувачка изјава, имајќи предвид дека токму Рајна ќе претседава со партиската конвенција во Кливленд на којашто до 18-ти до 21-вби јуни ќе се избира републиканскиот кандидат за претседателските избори. Во декември, кога Трамп предложи затворање на границите на САД на одреден период за муслиманите, Рајан решително го осуди.

Сепак, по разговорите во четвртокот, Трамп и Рајан во заедничката писмена изјава за медиумите велат дека таа средба била „многу позитивен чекор кон обединувањето“.

„САД не можат да си дозволат уште четири години Бела куќа на Обама, а тоа е она што го претставува Хилари Клинтон. Поради тоа, важно е републиканците да се обединат околу нашите заеднички вредности…, и да сторат сé што можеме да сториме да победиме оваа есен“, се вели во споменатата изјава.

Во соопштението се наведува дека имале „многу добри разговори“ кои биле „искрени“ во врска со разликите во погледите „истовремено препознавајќи ги важните области“.

Рајан подоцна во изјава рече дека состанокот со Трамп бил „охрабрувачки“, но дека тоа е само почетокот во напорите за обединувањето на партијата по долгата и жестока кампања на партиските предизбори.

Рејнс Приебус, претседател на републиканскиот Национален комитет, централното партиско тело, кој исто така присуствувал на состанокот, на Twitter напиша дека тоа бил „многу позитивен чекор кон единството на партијата“.

Помирувањето во Републиканската партија, најверојатно, е поттикнато од податокот што беше објавен во средата, според кој анкетата на Reuters/Ipsos покажува дека поддршката за Доналд Трамп, последните денови пораснала, и сега е речиси изедначен на национално ниво со најверојатната кандидатка на Демократската партија, поранешната прва дама на САД и државна секретарка, Хилари Клинтон

Во најновото споменати истражување, 41 отсто од Американците се изјасниле дека најверојатно ќе гласаат за Клинтон, а 40 отсто го поддржале Трамп, додека 19 проценти не биле одлучени.

Резултатите се одраз на големиот раст на поддршката за Трамп откако го порази сенаторот од сојузната држава Тексас, Тед Круз, а потоа од трката кај републиканците се откажа и единствениот преостанат кандидат за партиската номинација, гувернерот од Охајо Џон Кејсик, така што њујоршкиот кандидат остана единствениот во трката./крај/мф/сн

Извор: Reuters