Генералниот секретар на НАТО, Јенс Столтенберг, во понеделникот, пред одржувањето на состанокот на Алијансата свикан по барање на Турција, изјави дека турската армија е доволно моќна, како и дека немало барање за некоја позначајна воена поддршка од НАТО.

„Турција има многу моќни армии и безбедносни сили. Оттаму, немаше барања за некоја позначајна поддршка од НАТО“, изјави генералниот секретар на западниот воен блок, Јенс Столтенберг, пренесува AFP.

На барање на Турција, во вторник во Брисел ќе се одржи состанок на амбасадорите на 28-те земји членки на НАТО на кој ќе се одржат консултации во врска со конфронтацијата на Анкара и сунитските џихадисти од Исламската држава, од една страна, и со курдските борци, од друга страна.

Столтенберг потсети и дека НАТО уште во 2013 година на југот од Турција распореди проектили „Patriot“ и така придонел за противвоздушната одбрана на земјата. Тие ракетни системи, инаку, беа инсталирани во врска со тврдењата на Анкара дека силите на сирискиот претседател Башар ал-Асад чиешто заминување од власт го бараат Турција и Западот и нивните сунитски арапски сојузници во регионот.

Изразувајќи задоволство што Анкара решително се ангажирала во борбата против Исламската држава, челникот на НАТО истакна дека кога станува збор за бомбардирањата на позициите на Работничката партија на Курдистан (PKK) „самоодбраната мора да биде сразмерна“. Додаде дека веќе со години се прави напредок кон мирољубиво решени на судирот меѓу Турција и Курдите, како и дека е „важно тој напор да не оди низ ветер“.

Курдските борци во Сирија и во Ирак, инаку, се најефикасните во справувањата со Исламската држава и веќе ги потиснаа во некои области. Меѓутоа, од викендов позициите на сириските Курди Единиците за заштита на курдскиот народ (YPG) и базите во северен Ирак на забранетата во Турција Работничка партија на Курдистан (PKK) се под жестоки артилериски и воздушни бомбардирања.

Белата куќа, исто така, во понеделникот објави дека Турција има право да се брани од бунтовниците од PKK, која и Вашингтон ја смета за терористичка организација, оценувајќи дека Анкара има право да изведува акции врз терористички цели. САД и покрај прогласувањето на PKK на својата „црна листа“, одржува добри односи и ги вежба борците на регионалната курдска влада на северот од Ирак.

Се стравува дека по турските напади врз курдските милиции, дефинитивно ќе биде урнат процесот на преговарање за постигнување траен мир меѓу Анкара и PKK.

Во октомври 2012 година турските власти започнаа мировни преговори со лидерот на РКК, Абдула Оџалан, кој е заточен на доживотна робија откако беше уапсен и грабнат од припадниците на турските тајни служби во Кенија во февруари 1999 година. Во јуни истата година, тој беше осуден на смрт за тероризам и предавство и затворен на островот во Мраморно Море. Казната подоцна под притисок на меѓународната заедница беше заменета со доживотен затвор без право на помилување на островот Имрали во Мраморното Море јужно од Истанбул, откако под притисок на меѓународната јавност му беше заменета смртната казна. Со овие преговори требаше да се дојде до решавање на триесет ипетгодишниот турско-курдски судир за автономија на Курдите во кој загинаа над 40 илјади луѓе.

Според планот двете страни преземаа обврски, со кои требаше да се стави крај на долготрајниот конфликт. Дел од обврските беа исполнети, и во согласност со планот, PKK официјално прогласи прекин на огнот од 21-ви март 2012 година, кога се прославува курдската Нова година. Повлекувањето на курдските милитанти од турската територија кон планината Кандил во северен Ирак требаше да заврши на 15-ти август 2013 година. Наведениот датум зависеше од тоа дали Турција ќе ги усвои реформите со коишто ќе гарантира поголеми права за курдското малцинство, коешто според процените го има околу 15 милиони, што претставува 20 отсто од вкупното населени на Турција коешто брои 76 милиони луѓе. Курдските борци ја прекинаа таа операција во 2014 година, оценувајќи дека владата во Анкара не ги одржала ветувањата за реформите во полза на курдското малцинство.

Процесот на решавањето на курдското прашање беше загрозен и со протестите на курдското население откако џихадистите од Исламската држава преземаа повеќемесечна офанзива за заземање на Кобани, третиот по големина курдски град во соседна Сирија, а турските власти не дозволуваа пребеганите курдски борци или доброволци да се вратат и да го бранат градот. Во тој период зачестија и нападите врз турските војници. Во март годинава Оџалан ги повика своите поддржувачи да одржат конгрес на кој ќе се расправа за мирно решавање на курдското прашање./крај/мф/сн

Извор: Макфакс