Демонстрантите се судрија со полицијата и најмалку едно лице е повредено во германскиот град Гармиш-Партенкирхен во саботата пред состанокот на челниците седумте од најразвиените земји во светот од групата Г7 кој започнува во неделата во блискиот луксузен хотел, всушност преуредениот средновековен дворец Елмау.

Кога демонстрантите се обидоа да го пробија полицискиот кордон, полицијата одговори со солзавец. Настана метеж и кошкања по што најмалку едно лице е пренесено во болница, соопштија локалните власти.

Полицијата проценува дека на протестите околу 3.600 луѓе, а организаторите велат дека ги имало повеќе од 4.500 демонстранти. Агенциите, пак, јавуваат дека во питорескниот Гармиш-Партенкирхен во саботата имало повеќе полицајци од демонстранти.

„Никој не води сметка за сиромаштијата, тоа прашање не се решава и тоа не е чесно. Би можеле многу подобро да ги организираме своите економии“, изјави за Reuters еден од демонстрантите.

Рајнер Липферт, облечен во црвена маичка со натписот „Го симпатизирам Путин“, изјави дека исклучувањето на Русија и неприсуството на нејзиниот претседател Владимир Путин на работата на Г7 може само да доведе до ескалација на конфликтот. „Овде се случува почетокот на Студената војна бидејќи и двете страни ѕвечкаат со оружје“, смета Липферт.

Самитот на седумте најмоќни економии во светот ќе биде третиот на кој нема да присуствува рускиот претседател Владимир Путин кој е исклучен од поранешниот формат Г8, откако во март 2014 година прозападните сили во Киев го соборија претседателот Виктор Јанукович и веднаш потоа ги сменија гувернерите во доминатно рускојазичните региони и на рускиот јазик му го одземаа статусот на службен, руското население на црноморскиот полуостров Крим со огромно мнозинство на референдум одлучи да си ја поврати автономијата укината во 1990 година и да се присоедини кон Руската Федерација, што Западот го смета за нелегална руска анексија на украинска територија.

Сé додека Русија, обвинета дека ги поддржува бунтовничките сили во источна Украина што Москва го негира, „не го почитува меѓународното право, враќањето на форматот Г8 не е можно“, изјави неодамна германската канцеларка Ангела Меркел, домаќинка на самитот на Г7. Меркел пред самитот Г7 разговараше си украинскиот претседател Петро Порошенко. Двајцата челници ги повикаа двете страни да го почитуваат прекинот на огнот во источна Украина по неодамнешните судири.

Повеќе од 17.000 полицајци ќе го обезбедуваат самитот на челниците седумте индустриски најразвиени земи на светот, САД, Велика Британија, Канада, Италија и Јапонија, кој започнува во недела. На дводневниот состанок, со кој ќе претседава германската канцеларка, ќе бидат разгледувани низа прашања, од сегашната состојба на глобалната економија, тероризмот и сиромаштијата, како и климатските промени.

Но претходно во неделата претпладне германската канцеларка Меркел ќе се сретне со американскиот претседател Барак Обама во градскиот совет во Курен, а потоа ќе приреди закуска на главниот плоштад. Во неделата попладнето челниците се селат во дворецот Елмау, отсечен од светот и окружен со силни полициски сили, каде што ќе почнат работните седници.

На вториот ден од самитот, во понеделникот, на самитот ќе му се приклучат и ирачкиот премиер Хајдер ал-Абади и пет африкански челници, меѓу кои и тунискиот претседател Беџи Саид Есебеси и неговиот нигериски колега Махамаду Буари. Европскиот совет на самитот ќе ја претставуваат претседателот на Европската комисија, Жан-Клод Јункер, и претседателот на Европскиот совет, Доналд Туск./крај/мф/сн

Извор: Макфакс