Најмалку 45 цивили се убиени во воздушен напад врз населба на беглаци во понеделникот во Јемен, на петтиот ден од воената кампања која ја спроведуваат десет сунитски арапски земји предводени од Саудиска Арабија против побунетото шиитско племе Хути.

Населбата Ал Мазрак, во која се сместени Јеменци кои се прогонети поради судирите во северозападниот дел од земјата каде е активна и јеменската група на Ал Каеда, била ракетирана во воздушниот напад на силите на арапската коалиција и притоа се убиени 45 а ранети се 65 луѓе, се наведува во привремениот извештај на Меѓународната организација за миграции (IOM), чии претставници работат во населбата. Станува збор за најголем број цивилни жртви од четвртокот откако во Јемен започна интервенцијата на арапските земји од Персискиот залив што ја води Саудиска Арабија.

Според искази на очевидци за AFP, возилата на итната медицинска помош тешко доаѓаат во Ал Мазрак, поради тоа што коалицијата го бомбардирала патот кој води кон ова погранично место. Тоа е сместено на помалку од десет километри од воена база, рекле извори од локалните власти.

Во оваа населба од 2009 година престојуваат бегалци кои ги напуштиле своите домови поради судирите на Хутите и силите на централната влада во Сана. Во последните два дена во Ал Мазрак пристигнале нови петстотини семејства, изјави Пабло Марко, шеф на програмата на организацијата Лекари без граници (MSF) за Блискиот исток.

Агенциите јавуваат дека во понеделникот арапската коалиција продолжила со „максималниот притисок“ врз силите кои се спротиставуваат на владеењето на претседателот Абд Рабо Мансур Хади, кој ја напушти во февруари престолнината Сана, откако ја зазедоа милициите „Ансар Алах“ на Хутите, а минатиот четврток и пристанишниот град Аден, каде што исто така продреа шиитските бунтовници.

Хади изминатиот викенд ја доби поддршката до челниците на Арапската лига кои го одржаа самиот во египетското летувалиште Шарм ел-Шејк. Тие предупредија дека воената интервенција ќе продолжи „сé додека бунтовниците не го положат оружјето“. „Крајната цел на операцијата е повторно да се воспостави легитимната влада и да се покрене политичкиот процес. Ќе успееме во тоа“, изјавил за AFP неименуван дипломат од земја во Персискиот залив, сакајќи да ја истакне решителноста на коалицијата.

Во понеделникот навечер, северниот дел од главниот град Сана бил потресуван од експлозии од нови воздушни напади, јавува дописникот на AFP. Претходно офицер од силите лојални на Хади изјавил дека коалицијата од воздух и од море гаѓала колони војници коишто му се лојални на поранешниот претседател Али Абделах Салех, кои им се придружиле на Хутите, северно од Аден.

Истовремено со воената офанзива, силите коишто се противат на претседателот Хади, кој пребега во Саудиска Арабаија, се изложени и на дипломатски притисок. Така, Хади „на барање“ на Абу Даби го отповика од должноста амбасадор во Обединетите Арапски Емирати, Ахмед Али Салех, син на соборениот претседател, соопштија дипломати од Персискиот залив.

Се смета дека Али Абдалах Салех, кој беше претседател од 1978 до 2012 година, го овозможил подемот на шиитското племе Хути, инаку против кое неговата влада шестпати војуваше, поради справувањето со радикалните сили блиски на Ал Каеда. Кога пред три години беше принуден да се повлече од власта во текот на протестите како дел од ткн Арапска пролет, Салех им се приклучи на Хутите кои се побунија дека власта на претседателот Хади не прави ништо за да го сочува единството на земјата и им овозможува на радикалните сунитски групи да ги контролираат северните области од земјата, а самите тие од септември 2014 година заземаа големи делови во централните, западните и јужните области од Јемен.

Ширењето на влијанието на племето Хуту во добро вооружените племенски области во Јемен, ги поттикнаа локалните сунитски племенски милиции да се здружат за постигнување на заедничката цел со милитантите од Ал Каеда на Арапскиот полуострови, една од најопасните групации на глобалната терористичка мрежа Ал Каеда. Изминатите месеци исполнети со борби и бомбашки напади на AQAP насочени против Хутите во Сана, предизвикуваат стравување од разгорување општа секташка војна и во Јемен, како што тоа се случува во Сирија последните три години и во Ирак./крај/мф/сн

Извор: Макфакс